ខេត្តបាត់ដំបង÷ កាលពីថ្ងៃទី២៤ ខែកញ្ញា ឆ្នាំ២០២៣ វេលាម៉ោង០៣ និង៣០នាទី នៅចំណុចសកលវិទ្យាល័យ UME ក្នុងភូមិព្រែកព្រះស្ដេច សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង មានករណីហិង្សាដោយ ចេតនាមួយបានកើតឡើងបង្កដោយជនសង័្សយឈ្មោះ យឹង អ៊ុង ភេទប្រុស អាយុ ៣៧ឆ្នាំ រស់នៅភូមិព្រែកព្រះស្តេច ក្រុងនិងខេត្តបាត់ដំបង បានធ្វើសកម្មភាពបង្ករបួសស្នាមទៅលើជនរងគ្រោះឈ្មោះ ពៅ វាសនា ភេទប្រុស អាយុ៣៥ឆ្នាំ រស់នៅភូមិកម្មករ សង្កាត់ស្វាយប៉ោ ក្រុងនិងខេត្តបាត់ដំបង បណ្តាលឱ្យរងរបួសនៅក្រោមភ្នែកខាងឆ្វេងដេរ២ថ្នេរ,បែកថ្ងាសដេរ៧ថ្នេរ, បែកក្ក្បាលពីក្រោយដេរ៨ថ្នេរនិងបែកក្បាលចំហៀងខាងឆ្វេងដេរ២ថ្នេរហើយត្រូវបានក្រុមគ្រួសារនាំយកទៅព្យាបាលនៅមន្ទីរពេទ្យ។
ក្រោយពេលកើតហេតុរួច ជនរងគ្រោះបានប្តឹងចូលមកសមត្ថកិច្ចនគរបាលក្រុងបាត់ដំបងនិងដោយអនុវត្តតាមយោបល់ដឹកនាំរបស់លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបងនិងលោកឧត្តមសេនីយ៍ត្រី លឹម ពុទ្ធីឡា ស្នងការរងទទួលផែនការងារនគរបាលព្រហ្មទណ្ឌ លោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបងបានដឹកនាំកម្លាំងស្រាវជ្រាវរហូតឃាត់ខ្លួនជនសង័្សយខាងលើបាននាំមកធ្វើការសាកសួរនៅអធិការដ្ឋាននគរបាលក្រុង ដែលតាមការ
បញ្ជាក់របស់ជនសង័្សយបានឱ្យដឹងថា ពួកគេគឺជាមនុស្សស្គាល់គ្នា ហើយក្នុងពេលធ្វើដំណើររួមគ្នាដោយម៉ូតូចេញពីទីកន្លែងផឹកស៊ីមួយមកដល់ចំណុចខាងលើ ក៏កើតទំនាស់ពាក្យសម្តីជាមួយគ្នារហូតឈានទៅដល់ប្រើអំពើហិង្សានេះឡើង។
ពេលនេះជនសង័្សយត្រូវបានឃាត់ខ្លួននៅអធិការដ្ឋាននគរបាលក្រុងដើម្បីរៀបចំកសាងសំណុំរឿងបញ្ជូនទៅការិយាល័យជំនាញអនុត្តតាមច្បាប់៕
ដោយ៖សុរិយា
