ភ្នំពេញ៖ កម្លាំងផ្នែកនគរបាលយុត្តិធម៌ នៃអធិការដ្ឋាននគរបាលខណ្ឌទួលគោក បានធ្វើការបង្ក្រាបឃាត់ខ្លួនជនសង្ស័យ០១នាក់ជាក់ស្តែងពីបទលួចមានស្ថានទម្ងន់ទោស (ឆក់ទូរស័ព្ទដៃ០១គ្រឿង) ឃាត់ខ្លួនកាលពីរសៀលថ្ងៃទី០១ ខែតុលា ឆ្នាំ២០២៣ម្សិលមិញ ត្រង់ចំណុចផ្លូវលេខ២៦១ កែងផ្លូវលេខ២៣០ ក្រុមទី១៧ ភូមិ៧ សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
យោងតាមមន្ត្រីនគរបាលជំនាញព្រហ្មទណ្ឌខណ្ឌទួលគោក បានឱ្យដឹងនៅព្រឹកថ្ងៃចន្ទទី០២ ខែតុលា ឆ្នាំ២០២៣នេះថា៖ ជនសង្ស័យឈ្មោះ គឹម ប្រុសពៅ ហៅពៅ ភេទប្រុស អាយុ១៧ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅផ្ទះលេខ៦៥ E0 ផ្លូវលេខ១៤៦ ភូមិ៧ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ។ (មានសារធាតុញៀន)។
មន្ត្រីដដែលបន្តថា ក្នុងប្រតិបត្តិការនោះកម្លាំងជំនាញបានចាប់យកវត្ថុតាងពីជនសង្ស័យរួមមាន៖ ម៉ូតូ០១គ្រឿងម៉ាកHonda Dream c125 ពណ៌ខ្មៅ ពាក់ស្លាកលេខភ្នំពេញ 1IC-0329 មានលេខតួ និងម៉ាស៊ីន5690038 (មធ្យោយបាយធ្វើសកម្មភាព) ,ទូរស័ព្ទដៃ០១គ្រឿងម៉ាក redmi ពណ៌ប្រផេះ (ចាប់យកពីជនសង្ស័យ) បានប្រគល់ជូនជនរងគ្រោះវិញ។
ចំណែកជនរងគ្រោះឈ្មោះ Seah Kuan wai Maverick ភេទប្រុស អាយុ53ឆ្នាំ ជនជាតិសាំងហ្គារពួល មុខរបរ អ្នកជំនួញ ស្នាក់នៅបច្ចុប្បន្នអាគារFairfield by Marriott Phnom Penh ផ្លូវសហព័ន្ធរុស្សី សង្កាត់ផ្សារដេប៉ូទី៣ ខណ្ឌទួលគោក រាជធានីភ្នំពេញ ។
បច្ចុប្បន្នជនសង្ស័យខាងលើ កំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរនិងចាត់ការបន្តតាមនីតិវិធី៕
ដោយ៖សហការី
