ខេត្តកណ្តាល៖ គិតមកត្រឹមថ្ងៃទី៤ ខែកក្កដា ឆ្នាំ២០១៦នេះ ការដ្ឋានស្តារព្រែកមុខកំពូល មានទីតាំងស្ថិតនៅក្នុងឃុំស្វាយអំពារ និងឃុំរកាកោង ស្រុកមុខកំពូល ខេត្តកណ្តាល សម្រេចការងារបានប្រមាណ ៥៥ ភាគរយ ហើយ ។

សូមរំលឹកជូនថា ព្រែកមុខកំពូល ត្រូវបានក្រសួងធនធានទឹក និងឧតុនិយម បើកការដ្ឋានស្តារឡើងវិញ កាលពីថ្ងៃទី ១៦ ខែមិថុនា ឆ្នាំ ២០១៦ ដោយមានទំហំការងារ ៖ ស្តារតួព្រែកប្រវែង ៣.០០០ ម៉ែត្រ សាងសង់សំណង់ស្ទាក់ទឹក ទ្វារ ០៤ ចំនួន ០១ កន្លែង និងសាងសង់ផ្លូវចូលទៅសំណង់ស្ទាក់ទឹក ដោយក្រាលគ្រួសក្រហម ប្រវែង ២០០ ម៉ែត្រ ។

ក្រោយពេលស្តាររួច ព្រែកមុខកំពូល ដែលមានប្រភពទឹកពីទន្លេមេគង្គ នឹងផ្តល់ទឹកសម្រាប់បម្រើឱ្យការងារបង្កបង្កើនផលលើផ្ទៃដីប្រមាណ ៤.៥០០ ហិកតា ៕

ដោយ៖ សុវណ្ណារ៉ា