អុីរ៉ង់ព្រមានថា សកម្មភាពត្រៀមទុកជាមុនប្រឆាំងនឹងអុីស្រាអែលអាចនឹងកើតមាននៅប៉ុន្មានម៉ោងខាងមុខនេះ ខណៈដែលអុីស្រាអែលត្រៀមខ្លួនសម្រាប់ការវាយប្រហារលើតំបន់ហ្គាហ្សា។

ទីភ្នាក់ងារសារព័ត៌មាន Reuters និងកាសែត Times of Israel បានសរសេរថា ទីក្រុងតេអេរ៉ង់បានព្រមានម្តងហើយម្តងទៀតថា ការវាយប្រហារលើដីនៅតំបន់ហ្គាហ្សានឹងត្រូវបានឆ្លើយតប ពីអង្គការផ្សេងទៀត ដែលបានបង្កើនភាពតានតឹងកាន់តែខ្លាំងក្នុងជម្លោះ ដែលអាចទាញប្រទេសផ្សេងទៀតឱ្យធ្វើសកម្មភាព។
កាលពីយប់ (ថ្ងៃទី 16 ខែតុលា) រដ្ឋមន្ត្រីការបរទេសអុីរ៉ង់ លោក Hossein Amir-Abdollahian បាននិយាយថា “កងកម្លាំងប្រឆាំងអាចនឹងចាត់វិធានការទុកជាមុនក្នុងរយៈពេលប៉ុន្មានម៉ោងខាងមុខនេះ” ។ មន្ត្រីការទូតអុីរ៉ង់បាននិយាយដូច្នេះ ប៉ុន្តែមិនបានចូលទៅក្នុងសេចក្តីលម្អិតទេ។ កាលពីចុងសប្តាហ៍មុន លោក Hossein Amir-Abdollahian បានជួបប្រជុំជាមួយមេដឹកនាំក្រុម Hezbollah គឺលោក Hassan Nasrallah។
យោងតាមរដ្ឋមន្ត្រីការបរទេសអុីរ៉ង់ មេដឹកនាំតស៊ូនឹងមិនអនុញ្ញាតឱ្យអុីស្រាអែលធ្វើអ្វីដែលខ្លួនចង់បាននៅក្នុងតំបន់ហ្គាហ្សានោះទេ។ លោក Amir-Abdollahian បានបន្ថែមថា “ប្រសិនបើយើងមិនការពារ Gaza នៅថ្ងៃនេះទេ ថ្ងៃស្អែក អុីរ៉ង់នឹងត្រូវការពារប្រឆាំងនឹងគ្រាប់បែក នៅក្នុងមន្ទីរពេទ្យកុមាររបស់ខ្លួន”។
នៅព្រឹកថ្ងៃទី ១៦ ខែតុលា ប្រធានាធិបតីអុីរ៉ង់ លោក Ebrahim Raisi បាននិយាយថា ពេលវេលាដើម្បីឈានទៅដល់ដំណោះស្រាយនយោបាយជិតអស់ហើយ ហើយបានព្រមានប្រឆាំងនឹងការពង្រីកជម្លោះអុីស្រាអែល និងក្រុមហាម៉ាស់ទៅកាន់រណសិរ្សផ្សេងទៀត។
ជម្លោះរវាងអុីស្រាអែល នឹងក្រុមហាម៉ាស់បានផ្ទុះឡើងបន្ទាប់ពីក្រុមហាម៉ាស់ភ្លាមៗបានវាយប្រហារអុីស្រាអែលកាលពីថ្ងៃទី 7 ខែតុលា ដោយមានយុទ្ធជនរបស់អង្គការនេះចំនួន 1,500 នាក់បានរំលោភលើរបងព្រំដែនអុីស្រាអែល និងហ្គាហ្សានៅកន្លែងជាច្រើន។ ជាការឆ្លើយតប អុីស្រាអែលបានបើកការវាយប្រហារតាមអាកាសជាច្រើនប្រឆាំងនឹងតំបន់ហ្គាហ្សា ដោយធ្វើឱ្យអគារជាច្រើននៅក្នុងតំបន់នេះបាក់ស្រុត។
កាលពីសប្តាហ៍មុន មេដឹកនាំកំពូលរបស់អុីរ៉ង់ លោក Ayatollah Ali Khamenei បាននិយាយថា ទីក្រុងតេអេរ៉ង់ មិនមានជាប់ពាក់ព័ន្ធក្នុងការវាយប្រហាររបស់ក្រុមហាម៉ាស់លើអុីស្រាអែលនោះទេ៕ ដោយធីរីណា

រូប​ថត​: Reuters