រដ្ឋមន្ត្រីក្រសួងកីឡារបស់ប្រទេសប្រេស៊ីលលោក Andre Fufuca បាននិយាយកាលពីថ្ងៃអាទិត្យថា ប្រទេសប្រេស៊ីលបានដាក់លិខិតមួយច្បាប់ទៅកាន់ស្ថាប័នគ្រប់គ្រងបាល់ទាត់របស់ FIFA ដើម្បីស្នើសុំធ្វើជាម្ចាស់ផ្ទះព្រឹត្តិការណ៍ World Cup ស្ត្រីឆ្នាំ២០២៧។

 លោក Fufuca បានបង្ហាញឯកសារទៅប្រធាន FIFA លោក Gianni Infantino ខណៈពេលដែលគាត់នៅទីក្រុង Rio de Janeiro សម្រាប់ការប្រកួតវគ្គផ្តាច់ព្រ័ត្រ Copa Libertadores ដែលត្រូវបានឈ្នះដោយក្លិបប្រេស៊ីល Fluminense ជាលើកដំបូង។

 លោក Fufuca បាននិយាយនៅលើបណ្តាញសង្គម X ដែលពីមុនត្រូវបានគេស្គាល់ថាជា Twitter ថា “ខ្ញុំបានប្រគល់លិខិតទៅឱ្យFIFA និងសហព័ន្ធបាល់ទាត់ប្រេស៊ីលក្នុងនាមប្រធាន។ សេចក្តីប្រកាសរបស់រដ្ឋាភិបាលធ្វើឱ្យជាផ្លូវការនូវចេតនារបស់ប្រទេសប្រេស៊ីលក្នុងការធ្វើជាម្ចាស់ផ្ទះការប្រកួតបាល់ទាត់ពិភពលោកនារីឆ្នាំ២០២៧ ហើយការធានារបស់រដ្ឋាភិបាលតម្រូវឱ្យប្រទេសនានាដេញថ្លៃធ្វើជាម្ចាស់ផ្ទះការប្រកួតបាល់ទាត់ពិភពលោក” ។

 អាល្លឺម៉ង់ បែលហ្ស៊ិក និងហូឡង់ បានដាក់សំណើរួមគ្នាកាលពីខែមេសា ដើម្បីធ្វើជាម្ចាស់ផ្ទះការប្រកួត ខណៈការដេញថ្លៃរួមគ្នាផ្សេងទៀត រួមមានសហរដ្ឋអាមេរិក និងម៉ិកស៊ិក។ ប្រទេសប្រេស៊ីល និងអាហ្វ្រិកខាងត្បូង គឺជាប្រទេស២ផ្សេងទៀតដែលដាក់សំណើដេញថ្លៃ។

 សភា FIFA នឹងតែងតាំងម្ចាស់ផ្ទះតាមរយៈការបោះឆ្នោតជាសាធារណៈនៅថ្ងៃទី១៧ ខែឧសភា ឆ្នាំ២០២៤។ ប្រទេសអូស្ត្រាលី និងនូវែលសេឡង់ធ្វើជាម្ចាស់ផ្ទះនៃការប្រកួតបាល់ទាត់នារីឆ្នាំ២០២៣នេះ ដែលត្រូវបានគ្រងជើងឯកដោយក្រុមនារីអេស្ប៉ាញ។ ចំណែកសហរដ្ឋ អាមេរិក ម៉ិកស៊ិក និង កាណាដា នឹង ធ្វើ ជា សហ ម្ចាស់ ផ្ទះ ក្នុង ការ ប្រកួត World Cup ផ្នែក បុរស នៅ ឆ្នាំ២០២៦ ៕(រូបភាព ៖ Reuters/CNA)