ភ្នំពេញ៖ ខ្សែភាពយន្តខ្នាតធំរបស់ផលិតកម្មថោន ដែលដឹកនាំសម្តែងដោយអ្នកស្រី ពាន់ ភួងបុប្ផា បានប្រកាសចេញថតជាផ្លូវការហើយបន្ទាប់ពីពិធីក្រុងពាលីនេះត្រូវបានធ្វើឡើងកាលពីព្រឹកថ្ងៃទី៦ខែកក្កដានេះ។ តារាសម្តែង៤ជំនាន់ផ្សេងគ្នាដែលនឹងសម្តែងរូមគ្នាក្នុងខ្សែភាពយន្តនេះ ហើយតារាសម្តែង អម្ពរទេវី និងតារាសម្តែងស៊ឹម សូលីកា ដែលបាត់មុខពីការសម្តែងជាច្រើនឆ្នាំនោះត្រូវបានកា្លយជាតួសម្តែងដ៏ចាប់អារម្មណ៍បំផុតក្នុងខ្សែភាពយន្តនេះ។
តារាសម្តែងទាំងនោះមានដូចជាសិល្បករល្បីជំនាន់ទស្សវត្សរិ៍ទី៦០អ្នកស្រី ឌី សាវ៉េត តារាសម្តែងទសវត្សរិ៍ទី៩០អ្នកនាង អម្ពរ ទេវី លោកទេព រិនដារ៉ូ តារាសម្តែងល្បីឈ្មោះក្នុងឆ្នាំ២០០០អ្នកនាងស៊ឹម សូលីកា និងអ្នកនាងស្វែង សុជាតា និងតារាសម្តែងល្បីឈ្មោះក្នុងពេលបច្ចុប្បន្ន គឺអ្នកនាងសុខ សោម៉ាវត្តី កញ្ញាឌុច លីដា លោកយិតមាស ឧស្សាហ៍ និងតារាសម្តែងជាច្រើនរូបទៀតនឹងចូលរួមសម្តែងក្នុងខ្សែភាពយន្តរឿង”ទឹកចិត្តម្តាយសម័យថ្មី” ។
អតីតតារាសម្តែងស្រីល្បីឈ្មោះ អ្នកនាង អម្ពរ ទេវី បានបាត់មុខពីការសម្តែង អស់រយៈពេលជាង១ទស្សវត្សរ៍មកហើយនោះនឹងបង្ហាញទេពកោសល្យជាថ្មីក្នុងខ្សែភាពយន្តខាងលើនេះផងដែរ។ នាងអាចនឹងត្រូវចំណាយពេលច្រើនខែនៅលើទឹកដីនៃប្រទេសកម្ពុជាដើម្បីសម្តែងខ្សែភាពយន្តនេះជាថ្មី។ តាមគម្រោងនាងនឹងវិលមកដល់កម្ពុជាក្នុងអំឡុងខែសីហាខាងមុខនេះ។ ការសម្តែងជាថ្មីរបស់អ្នកនាងនឹងទទួលបានការចាប់អារម្មណ៍ច្រើនពីគ្រប់ស្រទាន់មហាជនព្រោះតែនាងគឺជាតារាសម្តែងដែលធ្លាប់បម្រើការកម្សាន្តរបស់ប្រជាជនខ្មែរឲ្យលង់លក់ក្នុងពិភពសន្តិភាពក្រោយពីបញ្ចប់សង្គ្រាមក្នុងស្រុកនោះ។
អ្នកនាង ស៊ឹម សូលីកា ដែលបានបាត់មុខពីពិភពសម្ដែង អស់រយៈពេលជាង១០ឆ្នាំមកហើយនោះ នៅពេលនេះអ្នកនាង ស៊ឹម សូលីកា បានសម្រេចចេញមុខ ក្នុងសិល្បៈផ្នែកសម្ដែងវិញហើយ ក្នុងរឿងថ្មីរបស់អ្នកស្រី ពាន់ ភួងបុប្ផា ក្នុងផលិតកម្ម ថោន មានចំណងជើងថា «ទឹកចិត្តម្ដាយសម័យថ្មី» ដោយនាងត្រូវសម្ដែងជាតួម្ដាយ។ ខកខានមិនបានសម្ដែងរឿង រយៈពេលជាង១០ឆ្នាំ អ្នកនាង ស៊ឹម សូលីកា បានបង្ហាញវត្តមានគួរឲ្យភ្ញាក់ផ្អើល ។ ទោះបីជា ស៊ឹម សូលីកា ឃ្លាតឆ្ងាយពីពិភពសម្ដែងយូរឆ្នាំហើយក្ដី ប៉ុន្តែអ្នកនាង ត្រូវបានមហាជនឃើញវត្តមានរបស់នាងជាហូរហែរក្នុងតំណែងជាពិធីការិនី នៅក្នុងកញ្ចក់ទូរទស្សន៍បាយ័ន និងការថតស្ពតពាណិជ្ជកម្មខ្លីៗ របស់ផលិតផលនានា។ អ្នកនាង ស៊ឹម សូលីកា បានសម្ដែងអារម្មណ៍រំភើបរីករាយ ពេលបានមកចូលរួមប្រឡូក ក្នុងការងារសម្ដែងវិញ ហើយបើទោះបីជារូបនាងខកខានមិនបានសម្ដែងរឿង ជាច្រើនឆ្នាំមកហើយក្ដី ប៉ុន្តែក្នុងចិត្តមិនដែលគិតថា នឹងបោះបង់ការងារមួយនេះចោលទេ ព្រោះសិល្បៈគឺនាងពេញចិត្តទាំងអស់។ ចំពោះមូលហេតុដែល ស៊ឹម សូលីកា មកបង្ហាញវត្តមានក្នុងរឿង «ទឹកចិត្តម្ដាយសម័យថ្មីនេះ» ត្រូវបាននាងបញ្ជាក់ថា ដោយសារតែនាងធ្លាប់ស្គាល់ពីស្នាដៃនិពន្ធ និងដឹកនាំសម្ដែងរបស់អ្នកស្រី ពាន់ ភួងបុប្ផា ធ្វើឲ្យអ្នកនាង មានជំនឿទុកចិត្ត និងផ្ដល់កិត្តិយសចូលរួមសម្ដែង គួបផ្សំជាមួយនឹងឱកាសក៏ផ្ដល់ឲ្យសមរម្យ។ នាងថា ក្នុងរឿងនេះ ខ្ញុំសម្ដែងជាតួអង្គម្ដាយម្នាក់ ក្នុងចំណោមម្ដាយទាំង៣នាក់ (មានអ្នកនាង អម្ពរ ទេវី និងអ្នកនាង ស្វែង សុជាតា) ហើយខ្ញុំនៅជាតួអង្គទី២ គឺម្ដាយថ្នាក់កណ្ដាល មានជីវភាពមធ្យម»។
អ្នកស្រីពាន់ភួងបុប្ផាបានបញ្ជាក់ថា ការជ្រើសរើសតារាសម្តែងអ្នកនាងអម្ពរទេវី និងអ្នកនាង ស៊ឹម សូលីកាព្រោះអ្នកទាំង២មានសមត្ថភាពសម្តែងនិងសាកសមទៅនឹងតួអង្គក្នុងរឿងនេះ។ អ្នកស្រីបញ្ជាក់ថា ដោយសារទំនាក់ទំនងគ្រាដែលអ្នកស្រីចេញទៅសហរដ្ឋអាមេរិកជាមួយនឹងអ្នកនាងអម្ពរ ទេវី ទើបនាងសម្រេចចិត្តទទួលថតខ្សែភាពយន្តនេះ។ អ្នកស្រីបញ្ជាក់ថា ក្រៅពីតារាសម្តែងល្បីឈ្មោះទាំងនេះក៏នឹងមានការបង្ហើរសំនៀងរបស់តារាចម្រៀងប្រុសស្រីល្បីឈ្មោះ២រូបគឺកញ្ញា មាស សុខសោភា និងលោក ខេម ក៏នឹងត្រូវបានលើកយកមកដាក់បញ្ចូលក្នុងខ្សែភាពយន្តនេះផងដែរ។ លោកស្រីបញ្ជាក់ដែរថា ខ្សែភាពយន្តនេះត្រូវបានគេរំពឹងថា នឹងផ្ទុះចេញនូវការគាំទ្រច្រើនពីទស្សនិកជនខណៈដែលវាគឺជាទស្សនីយភាពសិល្បៈពិសេសប្លែកមិនធ្លាប់មាន។ អ្នកស្រីបញ្ជាក់ថា កាលពីឆ្នាំ២០០៣អ្នកស្រីធ្លាប់បានធ្វើឲ្យកក្រើកវិស័យសិល្បៈភាពយន្តតាមរយៈខ្សែភាពយន្តរឿង”ទឹកចិត្តម្តាយ” ហើយគ្រានេះនឹងកាន់តែពិសេសដែលជាការឆ្លុះបញ្ចាំងពីទឹកចិត្តម្តាយនាសម័យបច្ចុប្បន្ន។ អ្នកស្រីបញ្ជាក់បន្ថែមថា នៅអំឡុងខែសីហា តារាសម្តែងជើងចាស់អម្ពរទេវី នឹងធ្វើដំណើរពីសហរដ្ឋអាមេរិកដើម្បីចូលរួមសម្តែងក្នុងខ្សែភាពយន្តនេះ។ អ្នកស្រីលើកឡើងដែរថា ខ្សែភាពយន្តនេះនឹងត្រូវចាក់បញ្ចាំងនៅរោងភាពយន្តក្នុងអំឡុងចុងឆ្នាំ២០១៦ ឬដើមឆ្នាំ២០១៧ខាងមុខ៕
ដោយ៖ វឌ្ឍនា
