គ្រូបង្វឹកក្រុមនារី Barcelona លោក Jonatan Giraldez នឹងចាកចេញពីក្លិបនៅចុងបញ្ចប់នៃរដូវកាល Liga F ដែលជាម្ចាស់ជើងឯកអេស្ប៉ាញបានប្រកាសកាលពីថ្ងៃចន្ទ។ លោក Giraldez ដែលបានចូលដឹកនាំក្លឹបនៅឆ្នាំ២០២១ បានឈ្នះពានរង្វាន់ Liga F ពីរដងក្នុងទម្រង់លេចធ្លោ ដោយ Barcelona ចាញ់តែមួយប្រកួតប៉ុណ្ណោះក្នុងចំណោម៧២ប្រកួតក្រោមការដឹកនាំរបស់ជនជាតិអេស្ប៉ាញ។

 គាត់បានដឹកនាំក្រុមនេះឱ្យឈ្នះពាន Women’s Champions League នៅឆ្នាំ២០២៣ ហើយក៏បានឈ្នះពានរង្វាន់ Copa de la Reina និង Spanish Super Cups ចំនួន២ផងដែរ ដើម្បីបង្កើតក្រុម Barcelona ជាក្រុមកំពូលមួយរបស់អឺរ៉ុប។

 លោក Giraldez បានប្រាប់អ្នកយកព័ត៌មានកាលពីថ្ងៃចន្ទថា “ខ្ញុំបានជូនដំណឹងទៅក្លិបថា ខ្ញុំមិនមានបំណងបន្តកិច្ចសន្យារបស់ខ្ញុំទេ។ខ្ញុំចង់ទុកពេលឱ្យពួកគេគ្រប់គ្រាន់ដើម្បីរៀបចំរឿង និងស្វែងរកអនាគតដ៏ល្អបំផុត។ កាលពីថ្ងៃសុក្រមុនខ្ញុំបានប្រាប់កីឡាករ និងបុគ្គលិកអំពីស្ថានភាព។ ខ្ញុំចង់ឱ្យពួកគេដឹងពីហេតុផលសម្រាប់ការសម្រេចចិត្តរបស់ខ្ញុំ“។

 លោក Giraldez ត្រូវ បាន គេ ភ្ជាប់ ជា មួយ នឹង ការ ផ្លាស់ ទៅ លីកបាល់ទាត់ នារី ជាតិ របស់ អាមេរិក (NWSL) ក្នុង ប៉ុន្មានសប្តាហ៍ ថ្មីៗ នេះ។ នៅពេលសួរអំពីព័ត៌មាននេះ លោក Giraldez បាននិយាយថា “ខ្ញុំអាចនិយាយបានថាវានៅខាងក្រៅទ្វីបអឺរ៉ុប។ខ្ញុំមិនចង់ប្រកួតប្រជែងជាមួយ Barcelona”។

 បច្ចុប្បន្នក្រុមនារី Barcelona កំពុងឈរនៅលើកំពូលតារាង Liga F ដោយមាន៣៦ពិន្ទុបន្ទាប់ពី១២ប្រកួត នាំមុខក្រុមលេខ២ Real Madrid ៩ពិន្ទុ៕ (រូបភាព ៖ Reuters/CNA)