ក្រុមហ៊ុន Hyundai បានប្រកាសដកខ្លួនចេញពីទីផ្សាររុស្ស៊ី ហើយបានលក់រោងចក្រដ៏ធំរបស់ខ្លួននៅក្នុងប្រទេសនេះក្នុងតម្លៃពិសេសត្រឹមតែ 77 ដុល្លារប៉ុណ្ណោះ។

ក្រុមហ៊ុនរថយន្តធំរបស់កូរ៉េ Hyundai បានប្រកាសពីការលក់រោងចក្ររបស់ខ្លួនក្នុងប្រទេសរុស្ស៊ី បន្ទាប់ពីបញ្ចប់ការដកខ្លួនចេញពីទីផ្សារប្រទេសនេះ។ រោងចក្រនេះត្រូវបានលក់ក្នុងតម្លៃបន្ទាប់បន្សំ 7,000 rubles ស្មើនឹង 77 USD។

យោងតាមសេចក្តីប្រកាសព័ត៌មានរបស់ក្រុមហ៊ុន Hyundai នៅថ្ងៃទី 19 ខែធ្នូ ក្រុមហ៊ុនផលិតរថយន្តកំពុងអនុវត្តនីតិវិធីចុងក្រោយជាមួយក្រុមហ៊ុនរុស្ស៊ី Art-Finance លើការលក់ភាគហ៊ុនទាំងអស់របស់ខ្លួននៅក្នុងរោងចក្រ រួមជាមួយនឹងកិច្ចព្រមព្រៀងទិញត្រឡប់មកវិញ។
ការផ្លាស់ប្តូររបស់ក្រុមហ៊ុន Hyundai ដើម្បីលក់ទ្រព្យសម្បត្តិនៅក្នុងប្រទេសរុស្ស៊ីក្នុងតម្លៃបន្ទាប់បន្សំជាមួយនឹងកិច្ចព្រមព្រៀងទិញត្រឡប់មកវិញបានដើរតាមគន្លងរបស់ក្រុមហ៊ុនធំៗ ផ្សេងទៀតជាមួយនឹងគោលដៅឆ្ងាយនៃការវិលត្រឡប់ទៅកាន់ទីផ្សារនេះនាពេលអនាគត។
រោងចក្រនេះមានទីតាំងនៅទីក្រុង St.Petersburg ហើយបានឈប់ដំណើរការនៅខែមីនា ឆ្នាំ2022 បន្ទាប់ពីក្រុមហ៊ុន Hyundai បានប្រកាសដកខ្លួនចេញពីទីផ្សាររុស្ស៊ីក្នុងបរិបទដែលរុស្ស៊ីចាប់ផ្តើមយុទ្ធនាការយោធាពិសេសនៅអ៊ុយក្រែន។
ក្រុមហ៊ុនបានប្តេជ្ញាចិត្តគាំទ្រដល់ម្ចាស់រថយន្ត Hyundai ក្នុងប្រទេសរុស្ស៊ី ក៏ដូចជាបន្តផ្តល់សេវាកម្មក្រោយពេលលក់ និងសេវាកម្មថែទាំអតិថិជនផ្សេងទៀត។
យោងតាមទីភ្នាក់ងារព័ត៌មាន Reuters ពីឯកសារផ្លូវច្បាប់ដែលបានសិក្សា Hyundai នឹងទទួលរងការខាតបង់ចំនួន 220 លានដុល្លារអាមេរិក (287 ពាន់លានវ៉ុន) ដោយសារតែការលក់រោងចក្រក្នុងតម្លៃទាប។
មន្ត្រីក្រុមហ៊ុន Hyundai បានប្រាប់ Reuters ថា ក្រុមហ៊ុននឹងទទួលបានប្រាក់សរុបចំនួន 10,000 rubles បន្ទាប់ពីលក់ទ្រព្យសម្បត្តិទាំងអស់នៅក្នុងប្រទេសរុស្ស៊ី។
ក្រុមហ៊ុន Hyundai Group និងក្រុមហ៊ុនបុត្រសម្ព័ន្ធរបស់ខ្លួន Kia Corp ស្ថិតក្នុងចំណោមក្រុមហ៊ុនរថយន្តដែលលក់ដាច់បំផុតទាំងបីនៅក្នុងប្រទេសរុស្ស៊ី មុនពេលជម្លោះរុស្ស៊ី-អ៊ុយក្រែន។ ក្រុមហ៊ុនធំៗទាំងនេះបានដកខ្លួនចេញពីទីផ្សារដោយសារតែសម្ពាធពីប្រទេសលោកខាងលិច និងការដាក់ទណ្ឌកម្មពាក់ព័ន្ធដែលផ្តោតលើប្រទេសរុស្ស៊ី៕ ដោយធីរីណា

រូប​ថត​:zuma press