នាយករដ្ឋមន្ត្រីថៃ បានកំណត់គោលដៅសេដ្ឋកិច្ចយ៉ាងធំធេងដោយលោកបានស្នើកញ្ចប់ថវិកាទ្រង់ទ្រាយធំមិនធ្លាប់មានពីមុនមក។

សារព័ត៌មាន Reuters នាថ្ងៃពុធ ទី៣ ខែមករា ឆ្នាំ២០២៤បានផ្សាយថា នាយករដ្ឋមន្រ្តីថៃ លោក Srettha Thavisin នៅថ្ងៃពុធនេះ បានដាក់សំណើកញ្ចប់ថវិកាទំហំ៣.៤៨ទ្រីលានបាត ស្មើនឹង១០១.៥២ពាន់លានដុល្លារ ទៅកាន់សភា។ ក្រុមសមាជិកសភាប្រទេសថៃ នឹងប្រើប្រាស់ពេល៣ថ្ងៃ ដើម្បីជជែកដេញដោលលើសំណើនេះ មុនធ្វើការបោះឆ្នោតសម្រេច។
លោក Srettha បានប្រាប់សភាថៃយ៉ាងដូច្នេះថា «សំណើកញ្ចប់ថវិកានេះ មានសារសំខាន់ជាខ្លាំង ដើម្បីជំរុញសេដ្ឋកិច្ចឱ្យឆ្ពោះទៅមុខ»។ លោកនាយករដ្ឋមន្រ្តីថៃបានបន្តថា ប្រទេសអាស៊ានមួយនេះ ត្រូវបានរំពឹងថា នឹងទទួលបានកំណើនសេដ្ឋកិច្ចចន្លោះ២.៧-៣.៧ភាគរយ នៅក្នុងឆ្នាំ២០២៤នេះ ខណៈអត្រាអតិផរណា ត្រូវបានរំពឹងថានឹងស្ថិតក្នុងកម្រិតចន្លោះពី១.៧-២.៧ភាគរយ។ សភាថៃនឹងធ្វើការបោះឆ្នោតចំពោះសំណើកញ្ចប់ថវិកាខាងលើក្នុងសប្តាហ៍នេះផ្ទាល់ ហើយវាត្រូវគេរំពឹងថា នឹងរៀបចំរួចរាល់នៅត្រឹមខ្ទង់ដើមខែឧសភា។
កំណើនសេដ្ឋកិច្ចថៃទទួលបានសន្ទុះត្រឹម១.៥ភាគរយ កាលពីត្រីមាសខែកក្កដា-កញ្ញា ឆ្នាំ២០២៣ ធៀបទៅនឹងរយៈពេលដូចគ្នា កាលពីឆ្នាំ២០២២។ វាជាកំណើនដ៏យឺតមួយ បើធៀបនឹងអត្រាដែលត្រូវបានព្យាករគឺ២.៤ភាគរយ ហើយជាកំណើនយ៉ាងទាបបំផុតក្នុងចំណោមត្រីមាសនានាប្រចាំឆ្នាំមុន៕ ដោយធីរីណា

រូប​ថត​:VNF