ភ្នំពេញ៖ កម្លាំងល្បាតនគរបាលប៉ុស្តិ៍បឹងកក់ទី២ និងកម្លាំងកងអន្តរាគនម៍ពិសេសរបស់ស្នងការដ្ឋាននគរបាលរាជធានីភ្នំពេញ បានធ្វើការឃាត់ខ្លួនជនសង្ស័យ២នាក់ពីបទប្រើប្រាស់គ្រឿងញៀនខុសច្បាប់ នៅចំណុចផ្លូវរថភ្លើងក្រុមទី១០៦ ភូមិ២៣ សង្កាត់បឹងកក់២ ខណ្ឌទួលគោក រាជធានីភ្នំពេញ កាលពីវេលាម៉ោង១រំលងអាធ្រាត្រឈានចូលថ្ងៃទី១២ ខែកក្កដា ឆ្នាំ២០១៦ និងបញ្ជូនមកអធិការដ្ឋាននគរបាលខណ្ឌទួលគោកដើម្បីសាកសួរ ។

តាមប្រភពពីមន្រ្តីនគរបាលខណ្ឌទួលគោកបានឲ្យដឹងថា ជនសង្ស័យទាំង២នាក់នោះទី១- ឈ្មោះហុក ចឹម ហៅ ទឺ ភេទប្រុសអាយុ២៣ឆ្នាំ មុខរបរ បើករថយន្តដឹកសុីម៉ង់ត៍ មានទីលំនៅផ្ទះជួល ភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ (អ្នកចូលទិញ) និងទី២- ឈ្មោះខួន សុខខេង ហៅខេង ភេទប្រុស អាយុ២២ឆ្នាំ មុខរបរបើករថយន្តដឹកក្រណាត់ មានទីលំនៅផ្ទះជួល ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ វត្ថុតាងចាប់យកមាន: -ក្រាមពណ៌សថ្លា១កូនថង់តូច សង្ស័យជាសារធាតុញៀន -ម៉ូតូ១គ្រឿងម៉ាក ហុងដាឌ្រីម សេ១២៥ ពណ៌ខ្មៅ ពាក់ស្លាកលេខភ្នំពេញ1CY-3033។

មន្រ្តីនគរបាលដដែលបានបន្តទៀតថា នៅមុនពេលឃាត់ខ្លួនបុរសសង្ស័យខាងលើនេះ គឺពួកគេបានទៅទិញថ្នាំញៀន នៅលើផ្លូវរថភ្លើង ដើម្បីយកមកប្រើប្រាស់។ លុះពេលទិញរួចហើយជិះម៉ូតូចេញមកវិញ ក៏ជួបនិងកម្លាំងល្បាតក្នុងមូលដ្ឋានឃើញនិងមានការសង្ស័យក៏ឃាត់ខ្លួនសួរនាំនិងរកឃើញគ្រឿងញៀនប្រភេទម៉ាកទឹកកកមួយកញ្ចប់តូចរួចឃាត់ខ្លួនភ្លាមៗតែម្តង។

បច្ចុប្បន្នជនសង្ស័យទាំង២នាក់កំពុងឃាត់ខ្លួននៅអធិការដ្ឋាននគរបាលខណ្ឌទួលគោក ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមផ្លូវច្បាប់៕

ដោយ៖ ស ដារ៉ា