ភ្នំពេញ ៖ មានរថយន្តដឹកស្រាបៀរមួយគ្រឿង ខណៈអ្នកបេីកបរក្នុងល្បឿនលឿនមិនប្រយ័ត្នមកដល់ផ្លូវកោងបួងចង្កូតខ្លាំងពេកស្រាប់តែក្រឡាប់ផ្ងាជេីងម្ខាង បង្កការភ្ញាក់ផ្អើលកាលពីវេលាម៉ោង ៨ និង ៤០ នាទីព្រឹក ថ្ងៃទី ៨ ខែមករាឆ្នាំ ២០២៤ ស្ថិតនៅត្រង់ចំណុចស្តុបឬស្សីផ្អែម ភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឱ្យដឹងថា នៅមុនពេលកើតហេតុគេឃើញបុរសម្នាក់បានបើករថយន្តម៉ាក ហុីយ៉ាន់ដាយ ពណ៌ស ពាក់ស្លាកលេខ ស្វាយរៀង 3A-0556 ដឹកស្រាបៀរពេញរថយន្ត ធ្វេីដំណេីរតាមបណ្ដោយផ្លូវ៥០ម៉ែត្រ ទិសដៅពីត្បួងទៅជេីងក្នុងល្បឿនលឿន ខណៈមកដល់ចំណុចកើតហេតុក៏បានបួងចង្កូតបត់ឆ្វេងរួចក៏រអិលបណ្ដាលឲ្យរថយន្តក្រឡាប់ផ្ងារជើង ធ្វេីឲ្យរថយន្តរងការខូចខាត តែក្នុងករណីនេះមិនបង្កឲ្យមានអ្នកណារងរបួសនោះឡេីយ ។
ក្រោយពេលកើតហេតុ សមត្ថកិច្ចមូលដ្ឋានសហការជាមួយសមត្ថកិច្ចជំនាញចរាចរណ៍ខណ្ឌដង្កោ ចុះទៅដល់កន្លែងកើតហេតុ និងបានពិនិត្យឃើញរថយន្តខាងលើមិនបង្កឲ្យមានអ្នករងរបួសហើយក៏មិនបណ្ដាលឲ្យខូចខាតដល់សម្បត្តិរដ្ឋទើបសមត្ថកិច្ចអនុញ្ញាតឲ្យអ្នកបើកបររថយន្តហៅរថយន្តស្ទូចដើម្បីស្ទុះយករថយន្តចេញពីដងផ្លូវទៅជួសជុលខ្លួនឯង៕ ដោយ ៖ ភារ៉ា ដង្កោ
