ភ្នំពេញ៖ អ្នកនិពន្ធទំនុកច្រៀងល្បីឈ្មោះគួរសមបានបង្ហើបពីការពិចារណាចាកចេញពីផលិតកម្មសាន់ដេជាផ្លូវការក្នុងពេលឆាប់ៗនេះឬយ៉ាងណា? ក្រោយពីជ្រកក្រោមដំបូលផលិតកម្មនេះអស់រយៈពេល៣ឆ្នាំ។ លោកមិនបានបញ្ជាក់ទេថា តើផលិតកម្មណាមួយដែលលោកសម្រេចចិត្តទៅនិពន្ធក្នុងពេលខាងមុខ ខណៈពេលនេះស្ថិតក្នុងកពិចារណារបស់លោកនៅឡើយ។
ការបញ្ជាក់នេះត្រូវបានធ្វើឡើងក្នុងពិធីខួបកំណើតរបស់លោកក្នុងវ័យ២៥ឆ្នាំកាលពីរាត្រីថ្ងៃទី១២ ខែកក្កដាឆ្នាំ២០១៦ នៅភោជនីយដ្ឋានវីហ្វ្រេនបឹងត្របែក។ លោកបញ្ជាក់ថា នៅដំណាច់ខែសីហានេះគឺជាពេលវេលាដែលលោកផុតកិច្ចសន្យាជាមួយនឹងផលិតកម្មសាន់ដេ ហើយលោកនឹងពិចារណាទៅនិពន្ធសម្រាប់ផលិតកម្មថ្មីឬយ៉ាងណា ក្រោយពីចប់កិច្ចស្យា៣ឆ្នាំនៅផលិតកម្មនេះ។
លោកបន្តថា មានផលិតកម្មមួយចំនួនបានទាក់ទងមកលោក ប៉ុន្តែលោកនឹងពិចារណាថា ចាកចេញឬបន្ត? ព្រោះតែលោកចង់មានជំនួបជាមួយផលិតកម្មសាន់ដេសិនមុនពេលចាកចេញដើម្បីពិភាក្សាគ្នាលើបញ្ហាមួយចំនួន។ លោកថា បើទោះជាលោកចាកចេញពីផលិតកម្មសាន់ដេ លោកនៅតែមានទំនាក់ទំនងល្អជាមួយផលិតករអ្នកដឹកនាំ និងអ្នកគ្រប់គ្រងនៅសាន់ដេ ព្រោះតែទីនេះបានជួយឲ្យលោកមានមុខមាត់គួរសមក្នុងអាជីពជាអ្នកនិពន្ធ។ លោកថា ការផ្លាស់ប្តូរ ការវិវត្តខ្លួន គឺជាអ្វីដែលលោកចូលចិត្ត នឹងចង់ដឹងចង់ឃើញអ្វីដែលថ្មី និងចង់ដឹងអំពីសមត្ថភាពរបស់ខ្លួនផងដែរ។
ក្រៅពីការពិពន្ធបទចម្រៀង លោកក៏កំពុងដំណើរការការនិពន្ធខ្សែភាពយន្តខ្នាតវែង និងខ្នាតខ្លីដែរ ខណៈដែលពេលនេះលោកក៏ចេញផលិតខ្សែភាពយន្តខ្នាតខ្លីបានមួយរឿងហើយដែរ ដែលនឹងចេញផ្សាយលើបណ្តាញទំនាក់ទំនងសង្គមក្នុងពេលឆាប់ៗនេះគឺ រឿង «កន្លែងដែលអូនប្រាថ្នា»។ ក្នុងគោលជំហរសម្រាប់ផលិតកម្មថ្មីឬនៅផលិតកម្មដដែលលោកនឹងបន្តពង្រីការនិពន្ធទំនុកច្រៀងថ្មីដែលមិនចម្លងពីបរទេស។
ជុំវិញកម្មវិធីខួបកំណើតវិញលោកបញ្ជាក់ថា នេះគឺជាលើកទី២ ក្រោយពីលោកចូលសិល្បៈ ហើយមិនមានអ្នកសិល្បៈច្រើនចូលរួមឡើយ ព្រោះតែលោកមិនចង់រំខានច្រើនសមា្រប់ពួកគេដែលមមាញឹកនឹងការងារ គឺមានតែមិត្តភ័ក្កិជិតដិត និងក្រៅរង្វង់សិល្បៈជាច្រើននោះ។ លោករំពឹងដែរថា ក្រោយពីខួបកំណើតរួចលោកនឹងមានដំណឹងល្អលើការងារសិល្បៈជាថ្មីបន្តទៀតផងដែរ៕
ដោយ៖ វឌ្ឍនា
