ខេត្តប៉ៃលិន៖ សិស្សសាលាម្នាក់រងរបួសបែកក្បាល មុខមាត់ និងដៃជើង ត្រូវបានសាច់ញ្ញាតិបញ្ជូនទៅមន្ទីរពេទ្យបង្អែកខេត្តប៉ៃលិនភ្លាមៗ ខណៈរូបគេជិះម៉ូតូយ៉ាងលឿនមិនប្រុងប្រយ័ត្នក៏ជ្រុលទៅបុកឆ្កែមួយក្បាលដែលរត់ឆ្លងផ្លូវ។

ហេតុការណ៍នេះបានកើតឡើងកាលពីវេលាម៉ោង៣និង២០នាទីរសៀលថ្ងៃទី១៣ ខែកក្កដា ឆ្នាំ២០១៦ នៅលើកំណាត់ផ្លូវជាតិលេខ៥៧ ស្ថិតក្នុងភូុមិអូរតាប្រាង សង្កាត់ប៉ៃលិន ក្រុង-ខេត្តប៉ៃលិន។

ប្រភពពីសមត្ថកិច្ចឲ្យដឹងថា ជនរងគ្រោះឈ្មោះ ចាន់ កក្កដា ភេទប្រុស អាយុ១៥ឆ្នាំ មុខរបរជាសិស្ស រស់នៅភូមិដីក្រហម សង្កាត់អូរតាវ៉ៅ ក្រុង-ខេត្តប៉ៃលិន (រងរបួសធ្ងន់) ជិះម៉ូតូម៉ាក HONDA DREAM C125 ពណ៌ខ្មៅ សេរី២០១៥ អត់ស្លាកលេខ រងការខូចខាត។

ប្រភពបន្តថា នៅមុនពេលកើតហេតុគេបានឃើញសិស្សសាលាមានគ្នា ៣នាក់បានជិះម៉ូតូ២គ្រឿងជែងគ្នាទៅវិញទៅមកក្នុងទិសដៅពីលិចទៅកើត មកដល់ចំណុចកើតហេតុស្រាប់តែមានសត្វឆ្កែមួយក្បាលរត់ឆ្លងផ្លូវទើបធ្វើឲ្យអ្នកបើកបរគេចមិនទាន់ជាន់ហ្វ្រាំងមិនជាប់ក៏ជ្រុលទៅបុកសត្វឆ្កែរត់ឆ្លងផ្លូវនោះបណ្ដាលឲ្យខ្លួនឯងដួលសន្លប់រងរបួសធ្ងន់ម្នាក់ឯងតែម្ដង។

នគរបាលក្រុងបានបន្តថា គ្រោះថ្នាក់ចរាចរណ៍នេះបណ្ដាលមកពីអ្នកបើកបរអត់គោរពច្បាប់ចរាចរណ៍ អត់ពាក់មួកសុវត្តិភាព ទើបបណ្ដាលឲ្យមានការគ្រោះថ្នាក់នេះកើតឡើង តែសំណាងល្អមិនបង្កគ្រោះថ្នាក់ដល់អាយុជីវិត។

បច្ចុប្បន្នជនរងគ្រោះបានបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តប៉ៃលិន ចំណែកម៉ូតូត្រូវបានក្រុមគ្រួសារយកទៅលំនៅដ្ឋានវិញ៕

ដោយ៖ ស សារ៉េត