បារាំងគ្រោងផ្គត់ផ្គង់សព្វាវុធថ្មីដល់អ៊ុយក្រែន

ចែករំលែក៖

មន្ត្រីបារាំងបាននិយាយថា ប្រទេសរបស់ខ្លួនកំពុងពិចារណាពង្រីកប្រភេទសព្វាវុធដែលផ្គត់ផ្គង់ដល់អ៊ុយក្រែន ដើម្បីបំពេញតាមស្តង់ដារសន្តិសុខខ្ពស់។

នាយករដ្ឋមន្ត្រីបារាំងលោក Gabriel Attal ក្នុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីអាល្លឺម៉ង់ Olaf Scholz នៅដើមសប្តាហ៍នេះ បាននិយាយថា Kiev បានទទួលមីស៊ីល SCALP ទំនើប កាំភ្លើងធំ Caesar រថពាសដែក AMX-10 RC ក៏ដូចជាកាំភ្លើងធំ AASM ។ បារាំងនឹងពង្រីកការគាំទ្រសម្រាប់អ៊ុយក្រែនមិនត្រឹមតែផ្នែកហិរញ្ញវត្ថុប៉ុណ្ណោះទេ ថែមទាំងជាមួយនឹងអាវុធជំនាន់ចុងក្រោយបង្អស់ផងដែរ។
លោក Gabriel Attal បានកត់សម្គាល់ថា “ការគាំទ្ររបស់បារាំងនឹងត្រូវបានពង្រីកមិនត្រឹមតែចំពោះធនធានហិរញ្ញវត្ថុប៉ុណ្ណោះទេ ប៉ុន្តែថែមទាំងចំពោះសព្វាវុធដែលបំពេញតាមស្តង់ដារសន្តិសុខខ្ពស់ ជួយអ៊ុយក្រែនក្នុងការទប់ស្កាត់ការវាយប្រហារ”។
បារាំងមិនបានបង្ហាញពីអាវុធថ្មីដែលខ្លួនគ្រោងនឹងផ្គត់ផ្គង់ដល់អ៊ុយក្រែនទេ។ ទោះយ៉ាងណាក៏ដោយ មុននោះ នៅថ្ងៃទី ១៦ ខែមករា ប្រធានាធិបតីបារាំង លោក Emmanuel Macron បានប្រកាសថា លោកនឹងផ្តល់ឱ្យអ៊ុយក្រែននូវមីស៊ីលរយៈចម្ងាយឆ្ងាយ SCALP ចំនួន ៤០គ្រាប់ និងគ្រាប់បែករាប់រយគ្រាប់ ដើម្បីឱ្យប្រទេសនេះអាចទប់ទល់នឹងការវាយប្រហារពីរុស្ស៊ី។
ជាមួយគ្នានេះផងដែរនៅក្នុងខែមករាឆ្នាំនេះ រដ្ឋមន្ត្រីការពារជាតិបារាំង Sebastien Lecornu បាននិយាយថា បច្ចុប្បន្នទីក្រុងប៉ារីសកំពុងលើកកម្ពស់គំនិតផ្តួចផ្តើមមួយដើម្បីផលិតកាំភ្លើងស្វ័យប្រកាស Caesar ចំនួន 78 សម្រាប់តម្រូវការរបស់កងកម្លាំង Kiev ដែលគំនិតផ្តួចផ្តើមនេះទាមទារមូលនិធិពីអឺរ៉ុប។
រុស្ស៊ីបានថ្កោលទោសម្តងហើយម្តងទៀតនូវការផ្គត់ផ្គង់សព្វាវុធរបស់បស្ចិមប្រទេសដល់អ៊ុយក្រែន ដោយកត់សម្គាល់ថា នេះនឹងអូសបន្លាយពេលជម្លោះ ហើយទីក្រុងម៉ូស្គូនឹងឆ្លើយតបជាមួយនឹងវិធានការតឹងតែងបំផុត៕ ដោយធីរីណា