ខេត្តស្វាយរៀង: យ៉ាងហោចណាស់ បុរសម្នាក់ស្លាប់និងរងរបួសធ្ងន់ម្នាក់ ដោយគ្រោះថ្នាក់ចរាចរណ៍គួរអោយរន្ធត់រវាងម៉ូតូនិងអ្នកដើរថ្មើជើងនៅស្រុកកំពង់រោទ៍។

ហេតុការណ៍នេះបានកើតឡើងនៅវេលាម៉ោង៧និង២០នាទីយប់ ថ្ងៃទី ១១ខែកុម្ភៈ ឆ្នាំ ២០២៤  លើផ្លូវកៅស៊ូលេខ 3SVR នៅត្រងចំណុចភូមិគគ្រួស ឃុំព្រៃធំ ស្រុកកំពង់រោទ៏។

សមត្ថកិច្ចនគរបាលស្រុកបានអោយដឹងថាអ្នកស្លាប់មានឈ្មោះ រាជ សុធា អាយុ ៤៥ ឆ្នាំ (ជាជនសតិមិនគ្រប់) មានទីលំនៅបច្ចុប្បន្ន ភូមិគគ្រួស ឃុំព្រៃធំ ស្រុកកំពង់រោទិ៍ ខេត្តស្វាយរៀង ។

ចំណែកអ្នករងរបួសធ្ងន់មានឈ្មោះ ឃឹម ខៃ ភេទប្រុស អាយុ២៨ ឆ្នាំ មុខរបរកម្មកររោងចក្រ មានទីលំនៅបច្ចុប្បន្ន ភូមិព្រៃធំ ឃុំព្រៃធំ ស្រុកកំពង់រោទិ៍ជិះម៉ូតូម៉ាក ហុងដាពណ៌ខ្មៅ សេរីឆ្នាំ២០២២ពាក់ស្លាកលេខស្វាយរៀង1S២២២៣ខូចខាតយ៉ាងដំណំ។

តាមអ្នកភូមិបានអោយដឹងថាមុនកើតហេតុ មានបុរសម្នាក់បានជិះម៉ូតូមួយគ្រឿង ម៉ាកហុងដាពណ៌ខ្មៅ សេរីឆ្នាំ២០២២ ពាក់ស្លាកលេខ ស្វាយរៀង1S២២២៣ ដោយធ្វើដំណើរ ពីរជើងទៅត្បូង ខណៈនោះស្រាប់តែមានបុរសម្នាក់ ដែលគេស្គាល់ ជាជនសតិមិនគ្រប់បានដើរថ្មើជើងមិនប្រយត្ន័ ពីត្បូងទៅជើង នៅតាមផ្លូវក៏បុកពេញទំហឹងបង្កការភ្ញាក់ផ្អើលតែម្ដង។

បច្ចុប្បន្ន វត្ថុតាងម៉ូតូ សមត្ថកិច្ចវាស់វែងនិងអូស យកមករក្សាទុក នៅប៉ុស្តិ៍នគរបាលរដ្ឋបាលព្រៃធំ រីឯសពបានប្រគល់ជូនបងប្អូនធ្វើបុណ្យតាមប្រពៃណីចំណែក អ្នករងរបួសត្រូវបានបងប្អូនបញ្ជូនទៅមន្ទីរពេទ្យបង្អែកស្រុកស្វាយទាប៕