ខេត្តស្វាយរៀង:សមត្ថកិច្ចនគរបាល បានធ្វើការឃាត់ខ្លួន ជនសង្ស័យ១ម្នាក់ ក្នុងចំណោម៤នាក់ក្នុងករណីលួច និងគាស់ដំបូលម៉ាត យកសម្ភារ មួយចំនួន នៅក្រុងបាវិត។

ការឃាត់ខ្លួនធ្វើឡើងនៅម៉ោង៣ និង៣០នាទីទៀបភ្លឺ
ឈានចូល ថ្ងៃទី ១២ ខែកុម្ភៈ ឆ្នាំ២០២៤ វេលាម៉ោង០៣ៈ៣០នាទីទៀបភ្លឺ នៅចំនុចដីឡូ ផ្លូវព្រៃយាយភូមិបាវិតកណ្តាល សង្កាត់បាវិត ក្រុងបាវិត។

សមត្ថកិច្ចនគរបាល បានអោយដឹងថាជនសង្ស័យដែលឃាត់ខ្លួនមានឈ្មោះ រ៉ូន ឈីត  អាយុ២៤ឆ្នាំ ជាតិខ្មែរ មុខរបរមិនពិតប្រាកដមានទីលំនៅភូមិកោះក្បាន ឃុំសំរោង ស្រុកចន្ទ្រា ខេត្តស្វាយរៀង បច្ចុប្បន្នស្នាក់នៅបន្ទប់ជួលស្ថិតនៅសង្កាត់បាវិតក្រុងបាវិតខេត្តស្វាយរៀង។

ប្រភពបន្តថា ចំពោះមុខសមត្ថកិច្ច ជនសង្ស័យបានឆ្លើយសារភាពថា នៅវេលាម៉ោង២រំលងអាធ្រាត្យ ថ្ងៃទី១២ ខែកុម្ភៈ ឆ្នាំ២០២៤ រូបខ្លួនកំពុងដេកនៅក្នុងបន្ទប់ជួល ក្រោយផ្សារអន្តរជាតិ បាវិត ស្រាប់តែមានលេខទូរស័ព្ទឈ្មោះ អាផាន់ណា បានទូរសព្ទ័មកប្រាប់ខ្លួនថា អោយយកម៉ូតូទៅដឹកអីវ៉ាន់ ដែលពួកវាលួចបាន ភ្លាមនោះខ្លួនក៏យកម៉ូតូមួយគ្រឿងម៉ាក វ៉ែវ ពណ៌ខ្មៅ ស្លាក់លេខ វៀតណាម 70K-1402.42 និងសម្ភារៈមួយចំនួនយកទៅ សម្រាប់ដឹកអីវ៉ាន់ ពេលទៅដល់ក្រោយ ម៉ាតនោះ ស្រាប់តែមានសមត្ថកិច្ចមកដល់ និងឃាត់ខ្លួនរូបគេសួរនាំ តែម្ដង។

ជនសង្ស័យបានឆ្លើយបន្តទៀតថា ពួកខ្លួនមានគ្នាសរុបទាំងអស់ ចំនួន០៤នាក់ និង បានធ្វើសកម្មភាពលួច និងគាស់ដំបូលម៉ាតនេះ និងលួចយកអីវ៉ាន់ (មី ប្រេងឆា កំព្យូទ័រ នំ) បានម្ដងមកហើយ  ហើយយកទៅលក់យកលុយចែកគ្នា អស់ហើយ។
សម្ភារៈដែលសមត្ថកិច្ចដកហូតបានរួមមានម៉ូតូ ០១គ្រឿង ម៉ាក វ៉េវ ពណ៌ខ្មៅ ស្លាក់លេខ 70-K1 402.42 វត្ថុមានមុខស្រួច សម្រាប់វះ យកអីវ៉ាន់ កាត់ដំបូលចំនួន ០៥ដើម ទួលណាវីស ចំនួន ០១
កន្រ្ទៃ០១ខ្សែរកៅស៊ូ សម្រាប់រិតចងអីវាន់ចំនួន០១ខ្សែរ  ។

ប្រភពបន្តថា ក្រោយពីបានចម្លើយ សមត្ថកិច្ចបានចុះទៅដល់កន្លែងកើតហេតុ ឃើញថា ផ្ទះដែលក្រុមជនសង្ស័យធ្វើសកម្មភាពគាស់កាត់ដំបូលចូលលួចអ៊ីវ៉ាន់ ជាផ្ទះមានបិទស៊ីល ( កំណត់ហេតុបិទទីតាំងបណ្ដោះអាសន្ន) ពាក់ព័ន្ធករណី ជនជួញដូរគ្រឿងញៀន កាលពីថ្ងៃទី២២ ខែមករា ឆ្នាំ២០២៤ ។

ក្រោយពីបានចម្លើយសារភាពរួច សមត្ថកិច្ចបានសុំគោលការ លោកព្រះរាជអាជ្ញា អមសាលាដំបូងខេត្ត ដើម្បីធ្វើការឃាត់ខ្លួន និងសួរនាំជនសង្ស័យបន្ត រកបក្សពួកបន្ថែម ទៀតដើម្បីចាត់ការបន្តតាមច្បាប់៕