ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានជំរុញទៅកាន់ក្រសួង ស្ថាប័ន ពាក់ព័ន្ធក្នុងការរៀបចំធ្វើច្បាប់អធិការកិច្ចឲ្យបានចេញនៅក្នុងឆ្នាំ២០២៤ ដើម្បីជាគោលនៃកិច្ចប្រតិបត្តិការណ៍ការងាររដ្ឋ។

សម្ដេចថា៖ «ខ្ញុំគិតថាក្រោយពីឆ្នាំនេះចេញយើងនឹងអាចដោះស្រាយបានទាក់ទងទៅនឹងការបែងចែកភារកិច្ចនិងគោលការណ៍»។
សម្ដេចលើកឡើងបែបនេះនៅក្នុងពិធីបិទសន្និបាតការងារឆ្នាំ២០២៣ របស់ក្រសួងអធិការកិច្ច នៅព្រឹកថ្ងៃអង្គារ ទី១៣ ខែកុម្ភៈ ឆ្នាំ២០២៤ នៅសណ្ឋាគារសុខាភ្នំពេញ។

ក្រោមការដឹកនាំរបស់សម្តេចតេជោ ហ៊ុន សែន កម្ពុជាបានប្រែក្លាយពីប្រទេសដែលហែកហួរដោយសារសង្រ្គាម ឱ្យទៅជាប្រទេសដែលមានសុខសន្តិភាព និងសុវត្ថិភាពពេញលេញ ។

សម្តេចធិបតី ហ៊ុន ម៉ាណែត បានថ្លែងថា ៖ នៅក្នុងរយៈពេលប្រមាណ ៤ទសវត្សកន្លងមកនេះ ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តី បានកែទម្រង់ប្រព័ន្ធសេដ្ឋកិច្ចកម្ពុជា ពីសេដ្ឋកិច្ចផែនការ ទៅជាសេដ្ឋកិច្ចទីផ្សារ និងបានប្រែក្លាយកម្ពុជាដែលហែកហួរដោយសារសង្រ្គាមស៊ីវិល ទៅជាប្រទេសដែលមានសុខសន្តិភាព និងសុវត្ថិភាពពេញលេញ។

សម្តេចធិបតី ហ៊ុន ម៉ាណែត បានគូសបញ្ជាក់ថា ៖ សមិទ្ធផលដ៏ត្រចះត្រចង់របស់រាជរដ្ឋាភិបាលនីតិកាលទី៦ នៃរដ្ឋសភា បានឆ្លុះបញ្ចាំងយ៉ាងប្រត្យក្សនៃភាពធន់ និងភាពរឹងមាំនៃវិស័យនយោបាយ សង្គម សេដ្ឋកិច្ច របស់ព្រះរាជាណាចក្រកម្ពុជាក្រោមអគ្គមគ្គុទេសក៏ ប្រកបដោយគតិបណ្ឌិត របស់សម្តេចតេជោ ហ៊ុន សែន អតីតនាយករដ្ឋមន្រ្តី។

សម្តេចធិបតី ហ៊ុន ម៉ាណែត បានសង្កត់ធ្ងន់ថា ៖ ជាមួយឆន្ទៈខ្ពស់ក្នុងការសម្រេចបាននូវចក្ខុវិស័យប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០ រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញនូវយុទ្ធសាស្រ្តបញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព ចីរភាព និងបន្តផ្តោតជាចម្បងលើរបៀបវារៈធានាប្រសិទ្ធភាព សមិទ្ធកម្ម តាមរយៈការអនុវត្តអភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» និងអភិក្រមជវភាពនៃតួអង្គប្រព័ន្ធតួអង្គតែមួយ ដែលផ្តោតសំខាន់លើការអភិវឌ្ឍស្ថាប័ន ការពង្រឹងអភិបាលកិច្ច និងការពង្រីកប្រសិទ្ធភាពការងារ នៅក្នុងវិស័យសាធារណៈ ដូចមានកំណត់នៅក្នុងស្នូលនៃយុទ្ធសាស្រ្តបញ្ចកោណដំណាក់កាលទី១៕

ដោយ ៖ សិលា