ភ្នំពេញ ៖ យុវជនពីរនាក់ជិះម៉ូតូឌុបគ្នា ក្នុងបរិវេណបឹងកក់ត្រូវបានក្រុមក្មេងទំនើងប្រដាប់ដោយដាវ ដេញកាប់បណ្ដាលឲ្យរងរបួសធ្ងន់ស្រាលទាំង២នាក់ ហើយអ្នករងរបួសធ្ងន់

ត្រូវបានបុរសចិត្តធម៌ម្នាក់ យករថយន្តផ្ទាល់ខ្លួនដឹកទៅសង្គ្រោះបន្ទាន់ភ្លាមៗ ចំណែកឯម្នាក់ទៀតដែលរងរបួសស្រាលបានរត់គេចខ្លួនរួច។

ហេតុតការណ៍នេះបង្កឲ្យមានការភ្ញាក់ផ្អើលឡើងកាលពីម៉ោង ១១និង៥០នាទីយប់ថ្ងៃទី២៥ខែកុម្ភៈឆ្នាំ២០២៤ កនុងក្នុងបរិវេណបឹងកក់ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ប្រភពពត័មានពីស្រ្តីម្នាក់ ដែលបានឃើញហេតុការណ៍បានឲ្យដឹងថា មុនពេលកើតហេតុគាត់ឃើញបុរសរងគ្រោះ២នាក់ បានជិះម៉ូតូមួយគ្រឿងម៉ាកហុងដាពណ៌ខៀវ ពាក់ស្លាកលេខ ភ្នំពេញ 1BE-7178 ជិះឌុបគ្នាតាមបណ្តោយផ្លូវបេតុង ក្នុងបរិវេណបឹងកក់ទិសដៅពីត្បូងសំដៅមកជើង ខណៈជិះមកដល់ក្បែរចំណុចកើតហេតុ ស្រាប់តែមានឃើញក្មេងទំនើងមួយក្រុម មានគ្នា៦នាក់ ជិះម៉ូតូពីរគ្រឿងប្រដាប់ដោយដាវបានជិះប្រដេញពីក្រោយ ជនរងគ្រោះរួចក៏បានដកដាវមកកាប់ប្រហារទៅលើយុវជនរងគ្រោះទាំងពីរនាក់ជាច្រើនដាវ បណ្ដាលឲ្យម្នាក់រងរបួសធ្ងន់ និងម្នាក់ទៀតស្រាល ហើយជនបង្កក៏បានបើកម៉ូតូគេចខ្លួនបាត់ស្រមោល។

បន្ទាប់ពីកើតហេតុកក៏មានកំលាំងសមត្ថកិច្ចចុះមកដល់កន្លែងកើតហេតុដើម្បីសួរនាំ និងមានបុរសម្នាក់ បានបើករថយន្តផ្ទាល់ខ្លួនជូនជនរងគ្រោះទៅមន្ទីរពេទ្យសង្គ្រោះបន្ទាន់ភ្លាមៗផងដែរ៕ជ្រោយពេជ្រ