ភ្នំពេញ៖ ផ្ទះប្រជាពលរដ្ឋចំនួន២ខ្នងរួមទាំងសម្ភារៈនៅក្នុងនោះត្រូវបានអគ្គិភ័យឆេះបំផ្លាញអស់ទាំងស្រុង។
ហេតុការណ៍នេះបង្កឲ្យមានការភ្ញាក់ផ្អើលឡើង កាលពី ម៉ោង១រំលងអធ្រាត្រឈានចូលថ្ងៃទី១៣ខែមីនា ឆ្នាំ២០២៤
ម្តុំត្រឡោកបែក នៅលើផ្លូវរថភ្លើងកែងផ្លូវលេខ៥៩៨ សង្កាត់ ភ្នំពេញថ្មី ខណ្ឌសែនសុខ រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុដោយឃើញមានមនុស្សមិនស្គាល់អត្តសញ្ញាណ បានមកដុតសំរាមនៅក្បែផ្ទះកើតហេតុ រួចក៏បន្តឆេះរាលដាលទៅលើផ្ទះពលរដ្ឋក្បែរនោះចំនួន២ខ្នង ដែលផ្ទះនោះតំបូលប្រកស៊ីប្រូខាងក្រោមធ្វើអំពីឈើបានឆាបឆេះយ៉ាងសន្ធោសន្ធៅ ពេលនោះដែរប្រជាពលរដ្ឋដែលរសនៅជិតខាងបាននាំគ្នាទាញទុយោទឹកបាញ់ទប់ស្កាត់ និងបានប្រមូលសម្ភារៈចេញពីក្នុងផ្ទះបានមួយចំនួន ហើយក៏ ទាក់ទងទៅសមត្ថកិច្ចមូលដ្ឋាន សុំរថយន្តពន្លត់អគ្គិភ័យមកជួយអន្តរាគមន៍បាញ់ពន្លត់ជាបន្ទាន់។ហើយសមត្ថកិច្ចមូលដ្ឋានបានទាក់ទងទៅខាង កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានចេញរថយន្តពន្លត់អគ្គិភ័យមកជួយអន្តរាគមន៍ភ្លាមៗផងដែរ។
បន្ទាប់មករថយន្តពន្លត់អគ្គីភ័យរបស់កម្លាំងសមត្ថកិច្ចជំនាញបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ចុះមកដល់បាញ់ពន្លត់ភ្លើងដោយប្រើប្រាស់ទឹកអស់ជាច្រើនគ្រឿងទើបរលត់ទៅវិញ។ ក្នុងហេតុការណ៍នេះដែរមិនមាននាក់រងរបួសនិង ស្លាប់នោះទេ គ្រាន់ខូចខាតតែផ្ទះចំនួន២ខ្នង រួមទាំងសម្ភារនៅក្នុងនោះអស់ទាំងស្រុង។ ចំពោះមូលហេតុនៃការឆាបឆេះសមត្ថកិច្ចបានបញ្ជាក់ថាគឺមកពីការដុតសំរាម៕ជ្រោយពេជ្រ
