ខេត្តកំពង់ឆ្នាំង៖ យោងតាមប្រភពព័ត៌មានពីកម្លាំងកងរាជអាវុធហត្ថខេត្តកំពង់ឆ្នាំង បានឱ្យដឹងនៅរសៀលថ្ងៃទី២២ ខែមីនា ឆ្នាំ២០២៤នេះថា៖ ក្រោមការបញ្ជារបស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពល ខេមភូមិន្ទ និងជាមេបញ្ជាការអាវុធហត្ថលើផ្ទៃប្រទេស បានអនុវត្តដីកាបញ្ជាឱ្យចូលខ្លួនរបស់អយ្យការអមតុលាការយោធា លុះនៅវេលាម៉ោង១០៖៣០នាទីព្រឹកថ្ងៃទី២១ ខែមីនាម្សិលមិញនេះ កម្លាំងកងរាជអាវុធហត្ថខេត្ត បានចុះស្រាវជ្រាវរហូតឈានដល់ការឃាត់ខ្លួនមនុស្ស៥នាក់ នៅស្រុកសាមគ្គីមានជ័យ ពាក់ព័ន្ធការជ្រើសរើសកងទ័ពខុសច្បាប់ និងក្លែងអត្តសញ្ញាណប័ណ្ណកងទ័ព។
ប្រភពដដែលបន្តថា ជនត្រូវចោទចំនួន៥នាក់ រួមមាន៖ ទី១៖ ឈ្មោះ ណែម សុផល អាយុ៤៣ឆ្នាំ រស់នៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មុខរបរកសិករ, ទី២៖ ឈ្មោះ អន សំណាង អាយុ៣២ឆ្នាំ រស់នៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មុខរបរលក់ដីឡូត៍, ទី៣៖ ឈ្មោះ ហឿន សីហា អាយុ២១ឆ្នាំ រស់នៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មុខរបរនិស្សិត, ទី៤៖ ឈ្មោះ សាំង ស៊ីថា អាយុ៣១ឆ្នាំ រស់នៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មុខរបរកសិករ ,និងទី៥៖ ឈ្មោះ យឹម យុទ្ធ អាយុ៣៣ឆ្នាំ រស់នៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង មុខរបរជាងម៉ូតូ។
ក្រោយកម្លាំងសមត្ថកិច្ចជំនាញ ឃាត់ខ្លួនជនទាំង៥នាក់ ត្រូវបានបញ្ជូនមកការិយាល័យព្រហ្មទណ្ឌកងរាជអាវុធហត្ថខេត្តកំពង់ឆ្នាំង ដេីម្បីកសាងសំណុំរឿងបញ្ជូនបន្តទៅអយ្យការអមតុលាការយោធា បន្តអនុវត្តតាមនីតិវិធីច្បាប់៕ដោយ៖តារា
