ប្រទេសឆាដបានបញ្ជាក់កាលពីថ្ងៃទី៣០ ខែកក្កដាថា កងទ័ពរបស់ខ្លួនបានសម្លាប់ក្រុមឧទ្ទាមបូកូហារ៉ាម១១៧នាក់ អំឡុងពេល២សប្តាហ៍ក្នុងយុទ្ធនាការដើម្បីបោសសម្អាតនៅតាមដែនកោះនានាស្ថិតនៅតាមដងទន្លេLake Chad ដែលក្រុមឧទ្ទាមប្រើប្រាស់សម្រាប់ជាទីតាំងលាក់ខ្លួន និងជាទីតាំងបន្ទាយដើម្បីធ្វើសកម្មភាពវាយប្រហារនោះ ។
ប្រទេសឆាដ បានដាក់ពង្រាយកងទ័ពរាប់ពាន់នាក់ ព្រមជាមួយដោយកងកម្លាំងមកពីប្រទេសជិតខាង ដូចជាកងទ័ពមកពីប្រទេសនីហ្សេរីយ៉ា, កាមឺរុន និងណៃជឺផងដែរដើម្បីតស៊ូប្រឆាំងជាមួយក្រុមឧទ្ទាមដែលផ្ទុះការបះបោរសម្លាប់មនុស្សរាប់ពាន់នាក់ក្នុងរយៈពេល៦ឆ្នាំកន្លងមក ។
លោក Azem Bermandoa អ្នកនាំពាក្យរបស់កងកម្លាំងយោធារបស់ប្រទេសឆាដបានថ្លែងថា «យើងបានសម្លាប់ក្រុមសកម្មប្រយុទ្ធបូកូហារ៉ាម១១៧នាក់ ក្នុងប្រតិបត្តិការរយៈពេល២សប្តាហ៍កន្លងមកនេះ។ កម្លាំងរបស់យើងបានបាត់បង់ជីវិត២នាក់ និងច្រើននាក់រងរបួស» ។ ប្រភពបន្តថា កម្លាំងទាហានសម្ពន្ធមិត្តបានរឹបអូសទូកជាច្រើនគ្រឿង និងអាវុធយុទ្ធោបករណ៍ជាច្រើនទៀតរបស់ក្រុមឧទ្ទាម អំឡុងពេលធ្វើប្រតិបត្តិការនោះផងដែរ ។
ក្រុមបូកូហារ៉ាម ដែលហៅខ្លួនឯងថាជារដ្ឋអិស្លាមស្ថិតនៅខេត្តអាហ្វ្រិកភាគខាងលិច ISWAP បានប្រកាសចុះចូលស្មោះស្ម័គ្រជាមួយក្រុមរដ្ឋអិស្លាមដែលកំពុងគ្រប់គ្រងដែនដីភាគច្រើនរបស់ស៊ីរី និងអ៊ីរ៉ាក់ ។ ក្រុមបូកូហារ៉ាមនេះបានបង្កើនសកម្មភាពវាយប្រហារនៅតាមបណ្តាប្រទេសស្ថិតតាមដងទន្លេ ក្នុងរយៈពេលប៉ុន្មានខែចុងក្រោយនេះ ទើបជាមូលហេតុនាំឲ្យមានការចងសម្ពន្ធមិត្តពីកងកម្លាំងយោធានៅក្នុងតំបន់ដើម្បីធ្វើសកម្មភាពទប់ទល់ និងបោសសម្អាតវិញ ។
កាលពីសប្តាហ៍មុននេះ ក្រុមឧទ្ទាមសង្ស័យថា ជាក្រុមរបស់បូកូហារ៉ាមបានធ្វើសកម្មភាពវាយឆ្មក់ចូលទៅកាន់ភូមិឋានដែលស្ថិតនៅតំបន់ដាច់ស្រយាលតាមដងទន្លេនោះ ៕
