ខ្សែប្រយុទ្ធសញ្ជាតិអាហ្សង់ទីនបាននិយាយថា គាត់នឹងមិនចាត់ទុកអាយុរបស់ខ្លួនជាកត្តាសម្រេចចិត្តក្នុងផែនការចូលនិវត្តន៍នោះទេដោយគាត់អះអាងថា មិនមានគំនិតច្បាស់លាស់អំពីការកំណត់អាយុទេ ទុកឲ្យពេលវេលាជាការកំណត់ទៅចុះ។
Messi ដែលបានលេងអស់រយៈពេល១៧ឆ្នាំនៅក្លិប Barcelona មុនពេលចុះហត្ថលេខាជាមួយ Paris St Germain ក្នុងឆ្នាំ២០២១និងលេងឲ្យក្លិប Inter Miami ឆ្នាំមុននឹងមានអាយុ៣៧ឆ្នាំក្នុងរយៈពេល៣ខែខាងមុខ ប៉ុន្តែដឹងច្បាស់ថា អាយុរបស់គាត់នឹងមិនកំណត់ថាពេលណាត្រូវព្យួរស្បែកជើងរបស់គាត់នោះទេ។
Messi បាននិយាយនៅក្នុងបទសម្ភាសន៍មួយដែលបានចេញផ្សាយកាលពីថ្ងៃព្រហស្បតិ៍ថា “ខ្ញុំដឹងថាពេលដែលខ្ញុំមានអារម្មណ៍ថាខ្ញុំលែងលេង, ខ្ញុំលែងរីករាយនឹងវា ឬជួយមិត្តរួមក្រុមរបស់ខ្ញុំ ខ្ញុំនឹងចូលនិវត្តន៍។ ខ្ញុំ ចេះ រិះគន់ ខ្លួន ឯង ខ្លាំង ណាស់ ខ្ញុំ ដឹង ថា ពេល ខ្ញុំធ្វើ បាន ល្អ ពេល ដែល ខ្ញុំ លេង បាន ល្អ ហើយ ពេល ដែល ខ្ញុំ លេង មិន ល្អ ពេល ដែល ខ្ញុំ មាន អារម្មណ៍ ថា ដល់ ពេល ត្រូវបោះ ជំហាន នោះ ខ្ញុំ នឹង ធ្វើ វា ដោយ មិន គិត ពី អាយុ។ ប្រសិនបើខ្ញុំមានអារម្មណ៍ល្អ ខ្ញុំនឹងព្យាយាមបន្តការប្រកួតប្រជែង ព្រោះវាជាអ្វីដែលខ្ញុំចូលចិត្ត និងអ្វីដែលខ្ញុំដឹងពីរបៀបធ្វើ“។
នៅពេលសួរថា តើគាត់បានចាប់ផ្តើមគិតអំពីអ្វីដែលគាត់ធ្វើបន្ទាប់ឬអត់? ខ្សែប្រយុទ្ធកំណត់ត្រាឈ្នះ Ballon D’Or ៨ដងរូបនេះមិនមានចម្លើយត្រង់ៗ នោះទេ។ Messi បាននិយាយថា “ខ្ញុំមិនទាន់បានគិតពីវានៅឡើយទេ សម្រាប់ពេលនេះ ខ្ញុំព្យាយាមរីករាយជារៀងរាល់ថ្ងៃ រាល់ពេល ដោយមិនគិតពីអនាគត។ ខ្ញុំមិនទាន់មានរឿងច្បាស់លាស់នៅឡើយទេ។ ខ្ញុំសង្ឃឹមថានឹងបន្តលេងឱ្យបានយូរព្រោះនោះជាអ្វីដែលខ្ញុំរីករាយ។ នៅពេលដែលពេលវេលាមកដល់ ខ្ញុំប្រាកដជានឹងស្វែងរកផ្លូវទៅកាន់អ្វីដែលខ្ញុំពេញចិត្ត និងតួនាទីថ្មី“។
Messi បានខកខានការប្រកួតមិត្តភាពរបស់អាហ្សង់ទីនទល់នឹង El Salvador និង Costa Rica នៅសហរដ្ឋអាមេរិកក្នុងខែនេះដោយសាររបួសសរសៃពួរ ៕ (រូបភាព ៖ Reuters/CNA)
