ភ្នំពេញ៖ ទទួលបានការរិះគន់យ៉ាងព្រោងព្រាតពីសំណាក់អ្នកប្រើប្រាស់បណ្តាញសង្គម ក្រោយលោកឧកញ៉ាខេមរៈ សិរីមន្ត បានចេញបទចម្រៀងថ្មី ដោយភ្ជាប់ជាមួយMV រាំគ្រលែងនៅតាម Pub Street អមជាមួយការកាន់កាំភ្លើងបាញ់ទឹក មើលទៅមិនសមទំនង ដោយមហាជនជាច្រើនបាននាំគ្នានិយាយថា អត្ថន័យបទចម្រៀងដូចមិនអីនោះទេ តែការរាំលេងបាញ់ទឹក ដូចមិនមែនជាប្រពៃណីខ្មែរ។
ក្នុងឱកាសកៀកចូលដល់បុណ្យចូលឆ្នាំថ្មី ប្រពៃណីជាតិខ្មែរ យើងសង្កេតឃើញថា មានតារាចម្រៀងជាច្រើនបាននាំគ្នាចេញបទចម្រៀងដើម្បីជាការអបអរដល់ថ្ងៃចូលឆ្នាំថ្មីដែលខិតជិតមកដល់។ ក្នុងនោះលោកឧកញ៉ាខេមរៈ សិរីមន្តក៏បានចេញបទចម្រៀងមួយបទដែរ ដែលមានចំណងជើងថា «ឆ្នាំហ្នឹងសប្បាយខ្លាំង» អមជាមួយMV បទភ្លេងបែបញាក់កន្រ្តាក់អារម្មណ៍ និងក្បាច់រាំមើលទៅឃើញយ៉ាងសប្បាយ។ តែជាក់ស្តែងអ្វីដែលទទួលបានពីការចេញបទចម្រៀងមួយនេះ គឺមានពាក្យរិះគន់ជាច្រើន ថាហេតុអ្វីមិនចេញបទបែបប្រពៃណីខ្លះ បទពីមុនៗគ្រាន់ចេញមកស្តាប់បានខ្លះ ឥឡូវវិញចប់ម៉ង។
ជាមួយនឹងការបកស្រាយពីការរិះគន់នៅលើMV លោកឧកញ៉ាខេមរៈ សិរីមន្តបានរៀបរាប់ថា៖ សូមអរគុណបងប្អូនទាំងអស់គ្នាដែលបានចាប់អារម្មណ៍ MV បទ “ឆ្នាំហ្នឹងសប្បាយខ្លាំង”បទនេះមិនមែនជាបទបែបប្រពៃណីទេគឺជាបទបែបសប្បាយៗ ចង្វាក់បែបទំនើប តាមសម័យកាលទំនើប ហើយមួយវិញទៀត យើងបានផ្សារភ្ជាប់ជាមួយនឹងក្អមខ្មែរនិងកាំភ្លើងជ័ររបស់ក្មេងៗលេង មានប្រភពមកពីអឺរ៉ុប ដែលមានលក់ពាសពេញពិភពលោក ហើយយើងបានច្នៃដាក់អក្សរអង់គ្លេសថា “I love Cambodia” និងអក្សរខ្មែរថា “ខ្ញុំស្រលាញ់កម្ពុជា” នៅលើកាំភ្លើងផងដែរ សង្ឃឹមថាបងប្អូននឹងរីករាយរាំលេង នាពេលចូលឆ្នាំថ្មីខាងមុខនេះ ហើយខ្ញុំបាទ ក៏មានបទចម្រៀងលក្ខណៈប្រពៃណីជាច្រើនបទទៀតដែលត្រៀមចេញផងដែរពេញលេងហើយធីមយើង។
ក្រោយមានការបកស្រាយហើយនោះ មានមតិមួយចំនួនក៏បានសំណូមពរថា៖ ស្នើសុំបងចេញបទប្រពៃណី ពីព្រោះត្រូវថែរក្សាអត្តសញ្ញាណជាតិរបស់យើង ចូលឆ្នាំខ្មែរ គឺបង្ហាញអំពី ប្រពៃណីខ្មែរ ទំនៀមទម្លាប់ដូនតាខែ្មរ កុំអោយបាត់បង់ នោះបរទេសគេ និងយល់អំពីទំនៀមទម្លាប់ វប្បធម៌ខ្មែរកាន់តែច្បាស់! សូមអរគុណក្នុងនាមជាខ្មែរ។
តបជាមួយការសំណូមពរ និងមតិរិះគន់លោកឧកញ៉ាខេមរៈ សិរីមន្ត ក៏បានចេញសារតបទៅវិញថា៖ បងប្អូនស្នើរសុំខ្ញុំអោយចេញបទបែបប្រពៃណីខ្ញុំនឹងចេញក្នុងពេលឆាប់ៗនេះតែខ្ញុំបាទសុំពីបងប្អូនវិញគឺសុំ 1Mរយៈពេលមួយថ្ងៃក្នុងយូធូបតើបានទេ។
ដោយឡែកជុំវិញបញ្ហានេះដែរ មតិមហាជនទូទៅ ក៏បានលើកឡើងថា សូមឱ្យលោកឧកញ៉ាខេមរៈ សិរីមន្ត ចំពោះការច្រៀង និងថត MV សូមធ្វេីឱ្យត្រឹមត្រូវតាមលក្ខណៈបែបប្រពៃណីខ្មែរ និងឱ្យបានពិរោះទៅបានហេីយ ព្រោះប្រសិនបើលោកចង់ឱ្យពលរដ្ឋគ្រាំទ្រខ្លួននោះ៕
