ភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងថា ៖ ការបណ្តុះបណ្តាលធនធានមនុស្សក្នុងវិស័យយោធា គឺជាផ្នែកមួយនៅក្នុងផែនការអភិវឌ្ឍជាតិរបស់រាជរដ្ឋាភិបាល ក្នុងបុព្វហេតុការពារបូរណភាពទឹកដីរបស់យើងទាំងអស់គ្នា។
សម្តេចធិបតី ហ៊ុន ម៉ាណែត បានថ្លែងដូចនេះ នៅព្រឹកថ្ងៃទី១៩ មេសា ២០២៤ ក្នុងឱកាសអញ្ជើញសម្ពោធអគារសហសិក្សាអគារស្នាក់នៅ អគារអាហារដ្ឋាន និងបិទវគ្គបណ្ដុះបណ្ដាល និងហ្វឹកហ្វឺនឆ្នាំ២០២៣ បន្តបើកវគ្គសិក្សាឆ្នាំ២០២៤ នៅសាកលវិទ្យាល័យការពារជាតិ។
សម្តេចធិបតី ហ៊ុន ម៉ាណែត បានថ្លែងបន្តថា ៖ ជាការពិតណាស់ សាកលវិទ្យាល័យការពារជាតិ គឺជាថ្នាលបណ្តុះបណ្តាលក្នុងវិស័យការពារជាតិដោ យផ្តោតជាសំខាន់លើវិទ្យាសាស្ត្រយោធា វិទ្យាសាស្ត្រសង្គម វិទ្យាសាស្ត្រនយោបាយ វិទ្យាសាស្ត្រពិត និងភាសា។ ការសិក្សានៅទីនេះផ្តោតជាពិសេសលើវិទ្យាសាស្ត្រយោធា ដែលជាវិទ្យាសាស្ត្រសិក្សាអំពីសឹកសង្គ្រាម ដែលស្រាវជ្រាវពីចរឹតលក្ខណៈរាល់ក្រឹត្យក្រមនៃសង្គ្រាម មានការប្រុងប្រៀបកងកម្លាំងប្រដាប់អាវុធ និងការកសាងខឿនការពារជាតិ ការប្រុងប្រៀបជាតិនៅពេលមានសង្គ្រាម និងរបៀបធ្វើសឹកនៅពេលមានសង្គ្រាម ព្រមទាំងបណ្តាសកម្មភាពផ្សេងៗទៀតរបស់កងកម្លាំងប្រដាប់អាវុធជាលក្ខណៈប្រពៃណី និងមិនប្រពៃណី។ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានជំរុញការបង្កើនទំនាក់ទំនងយោធាជាមួយនឹងបណ្ដាប្រទេសនានានៅក្នុងពិភពលោកដែលថាដើម្បីបង្កើតនូវមិត្តភាពនិងពង្រឹងសន្តិភាព។
សម្ដេចធិបតីបានលើកឡើងថាទំនាក់ទំនងយោធាគឺវាមានសារៈសំខាន់ណាស់ដោយវាជាអាវុធមុខ២ ដោយវាអាចបង្កើតសង្គ្រាមផង និងសន្តិភាពផង។
សម្ដេចថា ការពង្រឹងនូវទំនាក់ទំនងការទូតយោធាតាមរយៈការចូលរួមសមយុទ្ធយោធារួមគ្នាទាំងទ្វេភាគី ពហុភាគី និងការជំរុញស្វែងយល់ពីគ្នាទៅវិញទៅមក វាបង្កើតនូវមិត្តភាពនិងទំនាក់ទំនងល្អប្រសើររវាងកម្ពុជានិងប្រទេសផ្សេងៗទៀត៕
ដោយ ៖ សិលា
