ភ្នំពេញ៖ លោកវរសេនីយ៍ឯក ស៉ឹម ពិសិដ្ឋ អធិការនគរបាលខណ្ឌទួលគោក បានឱ្យដឹងនៅព្រឹកថ្ងៃទី០៣ ខែឧសភា ឆ្នាំ២០២៤នេះថា៖ កម្លាំងប៉ុស្តិ៍នគរបាលរដ្ឋបាលទឹកល្អក់ទី២នៃអធិការដ្ឋាននគរបាលខណ្ឌទួលគោក បានធ្វើការឃាត់ខ្លួនជនសង្ស័យម្នាក់ក្រោយពីធ្វើសកម្មភាពឆក់ទូរស័ព្ទរបស់និស្សិតស្រីម្នាក់ដែលកំពុងជិះម៉ូតូតាមដងផ្លូវ បានសម្រេចហើយព្យាយាមរត់គេចខ្លួន ប៉ុន្តែជាអកុសលក៏ប្រទះជាមួយកម្លាំងសមត្ថកិច្ចមូលដ្ឋានដេញតាមចាប់ឃាត់ខ្លួនតែម្តង។
លោកអធិការខណ្ឌរូបនេះបានបន្តថា ជនសង្ស័យឈ្មោះ មាស ដារ៉ា ហៅអាហុប ភេទប្រុស អាយុ២៩ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួល ផ្លូវលំ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ (មានសារធាតុញៀន) ពីបទលួចមានស្ថានទម្ងន់ទោស (ឆក់ទូរស័ព្ទដៃ០១គ្រឿងម៉ាកI phon 13 Pro Max ពណ៌ស) ត្រូវបានឃាត់ខ្លួននៅចំណុចមុខផ្ទះលេខ៦៤ ផ្លូវលេខ១៦០ ក្រុម២៣ ភូមិ៧ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ដែលប្រព្រឹត្តនៅចំណុចមុខផ្ទះលេខ២២ ផ្លូវលេខ២៦១ ភូមិ១៣ ក្រុម៣៧ សង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ កាលពីរសៀលថ្ងៃទី២ ខែឧសភាម្សិលមិញ។
វត្ថុតាងចាប់យក៖ ម៉ូតូ០១គ្រឿងម៉ាក SUZUKI Smash V ពណ៌ស ពាក់ស្លាកលេខភ្នំពេញ1EI.6982 លេខតួនិងលេខម៉ាសុីន900293(ជារបស់ជនសង្ស័យ)។ ទូរស័ព្ទដៃ០១គ្រឿងម៉ាកI phon 13 Pro Max ពណ៌ស(ជារបស់ជនរងគ្រោះបានប្រគល់ជូនជនរងគ្រោះវិញតាមការស្នើសុំ)។
ចំណែកជនរងគ្រោះឈ្មោះ ជូប៊រ ភេទស្រី អាយុ២៣ឆ្នាំ មុខរបរនិស្សិត ជនជាតិខ្មែរ។
បច្ចុប្បន្នជនសង្ស័យខាងលើកំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីធ្វើការសាកសួរនិងចាត់ការបន្តតាមនីតិវិធី៕អរុណរះ
