ខេត្តកណ្តាល ៖ ក្រុមការងារព័ត៌មាន និងប្រតិរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបបំភ្លឺជូនសាធារណជន និងបណ្តាញសារព័ត៌មាន ជ្រាប ស្តីពីកិច្ចប្រតិបត្ដិការស្រាវជ្រាវស៊ើបអង្កេតករណី៖ បើកលេងល្បែងស៊ីសងខុសច្បាប់ (បញ្ជល់មាន់) និងប្រើហិង្សារវាងអ្នកសារព័ត៌មានប្រហែល១០នាក់ ជិះរថយន្ត០៣គ្រឿង និងអ្នកលេងជល់មាន់ប្រហែល៤០នាក់ ។

ករណីសមត្ថកិច្ចបញ្ជាក់ថា ៖ កើតហេតុនៅថ្ងៃទី០៥ ខែឧសភា ឆ្នាំ២០២៤ វេលាម៉ោង១២:១០នាទី ស្ថិតចំណុច ចំការស្វាយ ភូមិផ្លូវត្រី ឃុំថ្មគរ ស្រុកល្វាឯម ខេត្តកណ្តាល។
សមត្ថកិច្ចបញ្ជាក់ថា ៖ ជនសង្ស័យចំនួន០២នាក់
១.ឈ្មោះ យូ ពៅ ភេទប្រុស អាយុ៤៣ឆ្នាំ មុខរបរមិនពិតប្រាកដ មានទីលំនៅភូមិផ្លូវត្រី ឃុំថ្មគរ ស្រុកល្វាឯម (អ្នកបើកកន្លែងជល់មាន់) (ឃាត់ខ្លួន)។
២.ឈ្មោះ ទី ភារម្យ ហៅ ពេទ្យ ភេទប្រុស អាយុ៣៧ឆ្នាំ មុខរបរមិនពិតប្រាកដ មានទីលំនៅភូមិ-ឃុំព្រែកតាសរ ស្រុកពោធិ៍រៀង ខេត្ដព្រៃវែង។ (គេចខ្លួន)

ចុងក្រោយតាមរយៈលទ្ធផលនៃការស្រាវជ្រាវនៅថ្ងៃកើតហេតុខាងលើ ក្រុមអ្នកលេងល្បែងជល់មាន់ បានលួចទៅបើកលេងនៅទីតាំងខាងលើ ហើយអ្នកសារព័ត៌មាន ក៏បានចុះទៅដល់ជួបជាមួយក្រុមអ្នកលេងល្បែងជល់មាន់ ហើយទារលុយពីអ្នកបើកចំនួន៥០០,០០០ រៀលក្នុង០១រថយន្ត ចំណែកអ្នកបើកល្បែងឲ្យត្រឹម២០០,០០០រៀល ក្នុង០១រថយន្ត ដោយជជែកមិនត្រូវគ្នា ទើបឈានទៅដល់ការប្រើហិង្សាដាក់គ្នា ដោយអ្នកលេងល្បែងម្នាក់ត្រូវបានអ្នកសារព័ត៌មាន យកមួកសុវត្ថិភាពទៅវាយចំក្បាល និងវាយម៉ូតូបណ្តាលឲ្យខូចខាត។
សមត្ថកិច្ចបន្តថា ៖ ក្រុមអ្នកសារព័ត៌មាន ដឹកនាំដោយឈ្មោះ ជាវ គឹមលាង គេហទំព័រគ្រុឌ០១ មានស្នាក់ការនៅរាជធានីភ្នំពេញ។
ដោយឡែកតាមការបំភ្លឺរបស់ ឈ្មោះ ស៊ិន វឿន ភេទ ប្រុស អ្នកទៅលេងជល់មាន់ នៅថ្ងៃកើតហេតុ គាត់បានឃើញក្រុមអ្នកកាសែត ជិះរថយន្តចំនួន០៣គ្រឿង មានម៉ាកព្រុស(Prius)ចំនួន០២គ្រឿង និង០១គ្រឿងទៀតមិនស្គាល់ម៉ាក បានចតនៅមុខច្រកចូលកន្លែងជល់មាន់។ លុះបានបន្តិចមកឈ្មោះ ជាវ គីមលាង រហ័សនាមគ្រុឌ០១ ជាចាងហ្វាងគេហទំព័រ គ្រុឌ០១ Krud 01 NEWS ដែលពាក់អាវយឺតដៃវែងពណ៌ស ស្លៀកខោពណ៌ខ្មៅ ពាក់ស្បែកជើងកីឡា(ប៉ាត់តា) ពណ៌ប្រផេះ បានស្រែកសួរអ្នកលេងល្បែងជល់មាន់ថា “អ្នកណាជាអ្នកដោះស្រាយរឿងលុយ” ពេលនោះ មានបុរសម្នាក់ បានទៅជួបថាឲ្យលុយ ចំនួន២០០,០០០រៀលក្នុងមួយឡាន តែឈ្មោះ ជាវ គីមលាង មិនព្រមយក ក៏បានស្រែកឡូឡាថា “អញចាងហ្វាងប៉ុណ្ណឹងដែរ យក២០០,០០០រៀលទៅធ្វើអី ទាល់តែ០១ឡាន៥០០,០០០រៀល បានអញយក”។
បន្ទាប់មកក្រុមអ្នកកាសែតបានដកទូរស័ព្ទមកធ្វើការថតឡាយ ស្រែកថាលោកស្នងការមើលផង មានកន្លែងបើកលេងជល់មាន់នៅស្រុកល្វាឯម ហើយក៏មានការដេញវាយគ្នាតែម្ដង។
ចំពោះចម្លើយសារភាព ឈ្មោះ យូ ពៅ អ្នកបើកទីតាំងល្បែង បានបញ្ជាក់ថា៖ នៅថ្ងៃទី០៥ ខែឧសភា ឆ្នាំ២០២៤ វេលាម៉ោង៧:០០នាទីព្រឹក ឈ្មោះពេទ្យ បានទូរស័ព្ទមកខ្លួនឲ្យរៀបចំសង្វៀនជល់មាន់នៅទីតាំងខាងលើ ពេលនោះខ្លួនបានទៅដឹកសម្ភារៈមករៀបចំធ្វើជាសង្វៀនជល់មាន់ មានដូចជាកៅស៊ូតង់ប្រក់ដំបូល ខ្សែគោព័ទ្ធជុំវិញបាញ់ថ្នាំក្រហម និងដាក់កៅអីសម្រាប់អង្គុយមើល។ រហូតដល់ម៉ោងប្រហែល១២:០០នាទីថ្ងៃត្រង់ទើបមានអ្នកយកមាន់មកជល់បណ្ដើរៗ និងចរចារគ្នា តខ្នាយផ្លែដែក ហើយឈ្មោះ យូ ពៅ ក៏បានចេញទៅយកទឹកមករៀបចំដាក់លក់។ លុះបានបន្ដិចក្រោយមកក៏មានអ្នកសារព័ត៌មាន មួយក្រុមចូលទៅថតឡាយ ធ្វើឲ្យអ្នកទៅលេងមាន់ជល់រត់ចេញអស់។ ខណៈនោះរូបខ្លួនបានជិះម៉ូតូមកដល់ផ្លូវបេតុង ស្រាប់តែមានរថយន្ដអ្នកសារព័ត៌មាន០២គ្រឿង ជិះមកកៀឲ្យដួល ឈប់បិទមុខ-ក្រោយ រួចបានវាយទៅលើរូបខ្លួនចំនួន០៣ដៃ។
ករណីខាងលើនេះ ជនសង្ស័យដែលជាអ្នកបើកលេងល្បែងស៊ីសងខុសច្បាប់(បញ្ជល់មាន់) ជំនាញបានឃាត់ខ្លួន កសាងសំណុំរឿងបញ្ជូនទៅតុលាការ ។
ចំណែកជំលោះរវាងអ្នកសារព័ត៌មាន ប្រើអំពើហិង្សា និងកំហែងយកប្រាក់ ទៅលើក្រុមអ្នកលេងល្បែងខុសច្បាប់ ជំនាញ កំពុងស្រាវជ្រាវកំណត់អត្តសញ្ញាណចាត់ការតាមនីតិវិធី។
អាស្រ័យហេតុនេះ សូមសាធារណជន និងបណ្តាញសារព័ត៌មានជ្រាប!
លោកឧត្តមសេនីយ៍ទោ ឈឿន សុចិត្ត បានបញ្ជាក់ថា ៖ នៅសល់២ក្រុមទៀត៖
១-អ្នកប្រើហឹង្សា
២-អ្នកកំហែងយកប្រាក់
ត្រៀមខ្លួនឲ្យហើយទៅ ចូលខ្លួនសារភាព អាចមានការបន្ធូរបន្ថយ តែបើមិនចូលខ្លួន គឺអនុវត្តច្បាប់ដោយគ្មានលើកលែង
សូមបញ្ឈប់ការប្រើពាក្យសម្តីមិនសមរម្យចោទទម្លាក់កំហុសមកលើខ្ញុំ និងមន្រ្តីរបស់ខ្ញុំដោយគ្មានមូលដ្ឋានច្បាស់លាស់ រាល់ទង្វើដែលអស់លោកបានប្រព្រឹត្ត គឺអស់លោកដឹងច្បាស់ហើយ ជាសារតាស់តឿនជូនដល់
-អ្នកញៀនលេងល្បែងស៊ីសងខុសច្បាប់
-អ្នកបើកលែងល្បែងស៊ីសងខុសច្បាប់
-អ្នកទៅសុំលុយពីកន្លែងបើកល្បែងខុសច្បាប់ ៕

ដោយ ៖ សិលា