ខេត្តបាត់ដំបង÷ មន្រ្តីនៃមន្ទីកសិកម្មខេត្តបាត់ដំបង បានឱ្យដឹងថា បច្ចុប្បន្នទូទាំងខេត្តបាត់ដំបង មានម៉ាស៊ីនកិនស្រូវចំនួន ៦៥៨គ្រឿង ក្នុងនោះខ្នាតធំតាមស្តង់ដារសម្រាប់ផលិតជាអង្ករ នាំចេញទៅក្រៅប្រទេសមានចំនួន ១១៤គ្រឿង,ខ្នាតមធ្យមមានចំនួន ២៦១ គ្រឿង និងខ្នាតតូចមាន ២៨៣គ្រឿង ហើយក្នុងនោះមានឡសម្ងួតស្រូវមានចំនួន ៩៦ គ្រឿងផងដែរ។

លោក ហេង សិទ្ធ មន្ត្រីកសិកម្មខេត្តបាត់ដំបងដឹងនៅថ្ងៃទី១៥ ខែឧសភា ឆ្នាំ២០២៤ថា រយៈពេលប៉ុន្មានឆ្នាំ មុន ម្ចាស់រោងម៉ាស៊ីនកិនស្រូវខ្នាតធំទូទាំងខេត្ត បាត់ ដំបងជួបបញ្ហាប្រឈមដោយខ្វះដើមទុនប្រមូលទិញស្រូវស្តុកទុក ខណៈគ្រានោះឡសម្ងួតស្រូវ ក៏នៅមាន កម្រិតនៅឡើយ ដែលធ្វើឱ្យសង្វាក់ផលិតកម្មដើរយឺត រហូតដល់ចុងឆ្នាំ២០២៣ រោងម៉ាស៊ីនខ្នាតធំក្នុងខេត្តទាំង១១៤គ្រឿង បានដំណើរការបានល្អប្រសើរឡើងវិញចន្លោះពី ៧០-៩០ ភាគរយនៃសង្វាក់ផលិតកម្ម។

ម្ចាស់រោងម៉ាស៊ីនកិនស្រូវដែលមានទីតាំងនៅស្រុកថ្មគោលខេត្តបាត់ដំបង លោក ហេង ផេង បានប្រាប់ឱ្យដឹងថា កាលពីប៉ុន្មានឆ្នាំមុន មានការខ្វះខាតឃ្លាំងស្តុកនិងឡសម្ងួតស្រូវ ស្របពេលដែលកសិករសម្រុកច្រូតព្រមគ្នាធ្វើឱ្យតម្លៃស្រូវចុះថោកខ្លាំង។ ប៉ុន្តែប៉ុន្មានឆ្នាំចុងក្រោយនេះ បញ្ហាត្រូវបានដោះស្រាយដោយសារការផ្តល់ឥណទានពីធនាគារអភិវឌ្ឍន៍ជនបទ ជួយគាំទ្រឱ្យបានដំណើរការល្អឡើងវិញ។

លោកបន្តថា ឃ្លាំងស្តុក និងឡសម្ងួតស្រូវលែងជាបញ្ហាទៀតហើយ ប៉ុន្តែកសិករ និងឈ្មួញកំពុងប្រឈមនាពេលបច្ចុប្បន្នគឺថ្លៃដើមផលិតកើនឡើងទៅតាមប្រេង ឥន្ធនៈ និងជីកសិកម្មឡើងថ្លៃជាដើម។ ម្ចាស់រោងម៉ាស៊ី នខ្នាតស្តងដារក៏ត្រូវការទុនបន្ថែមនៅរដូវប្រមូលផលដែរ ដើម្បីប្រមូលទិញស្រូវពីកសិករមកស្តុកទុកសម្រាប់ផលិតជាអង្ករនាំចេញ។

ម្ចាស់រោងម៉ាស៊ីនកិនស្រូវរូបនេះ បង្ហាញការសប្បាយចិត្ត ទៅនឹងការដាក់ចេញគោលនយោបាយ របស់រាជរដ្ឋាភិ បាលក្នុងការទម្លាក់កញ្ចប់ថវិកា១០០លានដុល្លារសម្រាប់ ត្រៀមក្នុងការជួយប្រមូលទិញកសិផលជា ពិសេសស្រូវពីកសិករកន្លងមក ហើយតាមរយៈគោល នយោបាយនេះម្ចាស់រោងម៉ាស៊ីនកិនស្រូវ អាចនឹងទទួលបានទុនបន្ថែមសម្រាប់ ប្រើប្រាស់ក្នុងការប្រមូលទិញស្រូវពីប្រជាកសិករសម្រាប់ស្តុក ដើម្បីកុំឱ្យស្រូវដែលបានផលិតហូរចេញទៅក្រៅប្រទេសច្រើនពេក ជាពិសេសប្រទេសជិតខាង នាំឱ្យកម្ពុជាបាត់ លទ្ធភាពនាំចេញ។

បើតាមរបាយការណ៍សហព័ន្ធស្រូវអង្ករកម្ពុជា កាលពីឆ្នាំ២០២៣ ប្រទេសកម្ពុជា បាននាំចេញអង្ករជាង ៦៥ ម៉ឺនតោន គិតជាទឹកប្រាក់ជាង ៤៦៦ លានដុល្លារ។ កម្ពុជាក៏ បាននាំចេញស្រូវជាង ៤ លានតោនសរុបជាទឹកប្រាក់ជាង ១,៣ ពាន់លានដុល្លារ ខណៈដែលចិន និងសហភាពអឺរ៉ុប ជាទីផ្សារធំជាងគេនៃអង្ករកម្ពុជា។

ដោយឡែក ក្នុងរយៈពេល ៤ ខែដំបូងឆ្នាំ ២០២៤ កម្ពុជារកចំណូល ពីការនាំចេញ ស្រូវនិងអង្ករសរុបជាង ៨៧០ លានដុល្លារអាម៉េរិក ក្នុងនោះការនាំ ចេញអង្ករគ្រប់ប្រភេទបានចំនួន ២៤ ម៉ឺនតោន ទៅកាន់ទីផ្សារអន្តរជាតិ ដែលរកចំណូលបាន ១៧០ លានដុល្លារអាម៉េរិក និងនាំចេញស្រូវសរុបបានចំនួនជាង ២ លាន ៤ សែនតោន ដែលគិតជាទឹកប្រាក់មានចំនួនជិត ៧០០ លានដុល្លារអាម៉េរិក៕