ភ្នំពេញ៖ ជនសង្ស័យម្នាក់ធ្វើសកម្មភាពឆក់ខ្សែ.កបានសម្រេច រត់មិនរួចត្រូវកម្លាំងនគរបាលខណ្ឌទួលគោក ឃាត់ខ្លួនបានភ្លាមៗ កាលពីវេលាម៉ោង៤និង៣០នាទីថ្ងៃទី២៥ ខែកក្កដា ឆ្នាំ២០១៦ នៅចំណុចផ្លូវលេខ៤៣០ ស្ថិតក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ជនសង្ស័យមានឈ្មោះ ប៉ុល ខួរចន្ដា ភេទប្រុស អាយុ១៨ឆ្នាំ មុខរបរកម្មករឡានស្តូត មានទីលំនៅម្ដុំទួលគោក ខណ្ឌទួលគោក ។ ជនរងគ្រោះមានឈ្មោះ សាយ សុគន្ធា ភេទស្រី អាយុ៣៧ឆ្នាំ មុខរបរអ្នកធ្វើអនាម័យ មានទីលំនៅម្ដុំផ្សារដើមថ្កូវ ខណ្ឌចំការមន ។ វត្ថុតាងចាប់យកមាន៖ ម៉ូតូ១គ្រឿងម៉ាកហុងដា ពណ៌ខ្មៅ ពាក់ស្លាកលេខ ភ្នំពេញ 1FX-8115 ។
ប្រភពព័ត៌មានពីសមត្ថកិច្ចឲ្យដឹងថា នៅមុនពេលកើតហេតុជនរងគ្រោះកំពុងតែជិះម៉ូតូ ១គ្រឿងម៉ាកឆាលី ពាក់ស្លាកលេខ ភ្នំពេញ 1F-2560 ពណ៌ស មកពីដើរលេងនៅផ្ទះមិត្តភក្ដិរបស់ខ្លួននៅម្ដុំសាលាសន្ធរមុខ ក្រោយមកនារីរងគ្រោះក៏បានជិះម៉ូតូត្រលប់មកផ្ទះវិញតែម្នាក់ឯង ហើយក៏ជិះម៉ូតូក្នុងទិសដៅពីត្បូងទៅជើង ខណៈមកដល់ចំណុចកើតហេតុខាងលើស្រាប់តែមានជនសង្ស័យម្នាក់ជិះម៉ូតូ១គ្រឿងម៉ាកហុងដា ពណ៌ខ្មៅ ពាក់ស្លាកលេខ ភ្នំពេញ 1FX-8115 ស្រាប់តែមកធ្វើសកម្មភាពឆក់ខ្សែ.កពីនារីរងគ្រោះបានសម្រេច រួចក៏ព្យាយាមជិះគេចខ្លួនពេលនោះស្រាប់តែសមត្ថកិច្ចបានឮសំឡេងស្រែកថា ចោរៗ ហើយកម្លាំងល្បាតក៏បានចេញប្រតិបត្តិការតាមដេញចាប់ជនសង្ស័យម្នាក់បានតែម្ដង ។
បច្ចុប្បន្នជនសង្ស័យរួមនឹងវត្ថុតាងនេះត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌចំការមនដើម្បីសាកសួរនិងចាត់ការតាមនីតិវិធី៕
ដោយ៖ សរស្មី
