ភ្នំពេញ ៖ រថយន្តស៊េរីទំនើបម៉ាកJEEP ពាក់ស្លាកលេខ ខេមរះភូមិន្ទមួយគ្រឿង ដែលបេីកបរដោយបុរសម្នាក់ បានធ្វេីដំណេីរក្នុងល្បឿនលឿនស្រាប់តែរេចង្កូតទៅបុកខឿនឡើងសួនពុះចែកទ្រូងផ្លូវរួចបន្តទៅបុកបង្គោលភ្លើងបំភ្លឺផ្លូវមួយដើមបាក់រាបដល់ដី ហើយរថយន្តបង្កបានប៉ះត្រូវរថយន្តធន់ធំមួយគ្រឿងកំពុងដឹករថយន្តជាច្រើនគ្រឿងបើកទិសដៅបញ្រ្ចាស់គ្នារងការខូចខាតយ៉ាងដំណំ។
ករណីគ្រោះថ្នាក់ចរាចរណ៍ខាងលើនេះបានបង្កការភ្ញាក់ផ្អើលកាលពីវេលាម៉ោង១១:៣០នាទីយប់ថ្ងៃទី០២ ខែមិថុនា ឆ្នាំ២០២៤ ស្ថិតនៅលើផ្លូវភ្នំពេញហាណូយ សង្កាត់ឃ្មួញ ខណ្ឌសែនសុខ រាជធានីភ្នំពេញ។
យោងតាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកើតហេតុគេឃើញរថយន្តស៊េរីទំនើបម៉ាកJEEP ពណ៌ប្រផេះ មួយគ្រឿង ពាក់ផ្លាកលេខ ខេមរះភូមិន្ទ ០៥ ២-៩៤២០ បើកបរដោយបុរសម្នាក់ធ្វើដំណើរតាមបណ្តោយផ្លូវភ្នំពេញហាណូយ ទិសដៅពីលិចមកកើតក្នុងល្បឿនយ៉ាងលឿន ខណះពេលបើកមកដល់ចំណុចកើតហេតុផ្លូវកោង ក៏រេចង្កូតជ្រុលទៅបុកខឿនឡើងសួនពុះចែកទ្រូងផ្លូវរួចបន្តទៅបុកបង្គោលភ្លើងបំភ្លឺផ្លូវមួយដើមយ៉ាងពេញទំហឹងបណ្តាលឲ្យបាក់រាបដល់ដី ចំណែករថយន្តបង្កបានវេកន្ទុយបោកផ្ទប់ដាច់កង់សារគួរទៅត្រូវរថយន្តធុនធំមួយគ្រឿងកំពុងដឹករថយន្តជាច្រេីនគ្រឿងដែលបើកក្នុងទិសដៅបញ្រ្ចាស់គ្នាពីកើតមកលិចបណ្ដាលឲ្យរងការខូចខាត សំណាងល្អមិនបង្កឲ្យមានមនុស្សរងរបួស ។ ដោយឡែកអ្នកបើករថយន្តបង្កត្រូវសមត្ថកិច្ចឃាត់បានផងដែរ ។
ក្រោយកើតហេតុ សមត្ថកិច្ចមូលដ្ឋានបានសហការជាមួយនឹងមន្ត្រីជំនាញចរាចរណ៍ ចុះមកធ្វេីការវាស់វែងយករថយន្តបង្កនិងរថយន្តរងគ្រោះទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំការដោះស្រាយនៅពេលក្រោយ៕ដោយ ៖ ភារ៉ា ដង្កោ
