ខេត្តកំពត៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅព្រឹកថ្ងៃទី០៦ ខែមិថុនា ឆ្នាំ២០២៤នេះ បានថ្លែងប្រសាសន៍សំខាន់ៗនាឱកាសអញ្ជើញជាអធិបតីភាពក្នុងពិធីសម្ពោធបើកឱ្យប្រើប្រាស់ជាផ្លូវការកំពង់ផែពហុបំណងកំពត ក្នុងខេត្តកំពត ដែលសាងសង់រួចរាល់ដំណាក់កាលទី១ តម្លៃប្រមាណ១៤០លានដុល្លារអាមេរិក។
សូមអានប្រសាសន៍សំខាន់ៗរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានដូចខាងក្រោម៖
-សម្ដេចធិបតី ហ៊ុន ម៉ាណែត បានថ្លែងថា កំពង់ផែពហុបំណងកំពត ត្រូវបានចាត់ទុកថា នឹងក្លាយជាកំពង់ផែទឹកជ្រៅមួយទៀតនៅកម្ពុជា និងជាកំពង់ផែដ៏ទំនើបដែលមានស្រាប់ ព្រមទាំងជួយបំពេញបន្ថែមឱ្យកំពង់ផែស្វយ័តក្រុងព្រះសីហនុ និងកំពង់ផែស្វ័យ័តភ្នំពេញ។
-សម្តេចធិបតី ថ្លែងថា កំពង់ផែពហុបំណងកំពត នឹងក្លាយជាសរសៃឈាមពាណិជ្ជកម្មដ៏សំខាន់មួយ ក្នុងការដឹកជញ្ជូនទំនិញតាមផ្លូវទឹកគ្រប់បែបយ៉ាងសម្រាប់កម្ពុជា។
-សម្តេចធិបតី ថ្លែងថា ដើម្បីឲ្យប្រទេសជាតិមួយរីក ចម្រើនគឺមិនមែនយករាជធានី ឬខេត្តណាមកប្រកួតប្រជែងគ្នានោះទេគឺត្រូវរួមគ្នាធ្វើ ខណៈខេត្តនីមួយៗគឺ មានសក្តានុពលច្រើន ដូចជាខេត្តកំពតជាដើម គឺពេលនេះគឺមានកំពុងមានកំពង់ផែដែលវានឹងបម្រើឲ្យមានការលូតលាស់ផ្នែកភស្តុភារ ក្នុងការដឹកជញ្ជូនភស្តុភារកម្ម។
-សម្តេចធិបតី ថ្លែងថា ការដឹកជញ្ជូនតាមផ្លូវទឹកនៅតែជាជម្រើសដ៏ល្អសម្រាប់ប្រទេស ដោយសារតែការដឹកជញ្ជូនតាមផ្លូវទឹកនេះ វាដឹកបានច្រើនហើយវាមានតម្លៃសមរម្យទៅទៀត។
-សម្ដេចធិបតី បានអំពាវនាវឱ្យប្រជាពលរដ្ឋ បន្តចូលរួមគាំទ្រ ទាំងគោលគំនិត និងស្មារតី ដល់គម្រោងព្រែកជីកហ្វូណនតេជោ ដើម្បីការរីកចម្រើនឈានទៅមុខដោយរលូននៃការប្រែក្លាយប្រទេសជាតិ និងចូលរួមបន្តគាំទ្រដោយជឿទុកចិត្តទៅលើរាជរដ្ឋាភិបាលដែលធ្វើដើម្បីបុព្វហេតុជាតិ។
-សម្តេចធិបតី ថ្លែងថា រាជរដ្ឋាភិបាលកម្ពុជា មិនផ្តល់នូវអាជ្ញាប័ណ្ណឱ្យបើកក្រុមហ៊ុន កាស៊ីណូនៅក្នុងក្រុងកំពត និងកែបឡើយ លើកលែងតែនៅបូកគោ។
-សម្តេចធិបតី បានគូសបញ្ជាក់ថា អ្នកចង់បើកកាស៊ីណូ សូមទៅបើកនៅតំបន់ជាយព្រំដែន ឬនៅក្នុងខេត្តព្រះសីហនុ ដែលនៅមិនឆ្ងាយប៉ុន្មានពីខេត្តកំពត និងខេត្តកែប។ ផ្ទុយទៅវិញ សម្តេចធិបតី បានប្រកាសស្វាគមន៍ចំពោះការចង់បើកអាជីវកម្មផ្សេងៗក្រៅពីកាស៊ីណូនៅក្នុងខេត្តកំពត និងខេត្តកែប។
-សម្តេចធិបតី ថ្លែងសង្កត់ធ្ងន់ថា រាជរដ្ឋាភិបាលនឹងមិនចេញអជ្ញាបណ្ណឲ្យបង្កើតបនល្បែងកាស៊ីណូបន្តទៀតនោះទេ សម្រាប់ក្រុងខេត្តកំពត ប៉ុន្តែនឹងមានការលើកទឹកចិត្តឱ្យមានការបើកសណ្ឋាគារ កន្លែងកម្សាន្ត និងកម្មន្តសាលនានា ដើម្បីលើកកម្ពស់សេដ្ឋកិច្ចសម្រាប់ខេត្តនេះឱ្យកាន់តែល្អប្រសើរបន្ថែមទៀត។
-សម្តេចធិបតី ថ្លែងអំពាវនាវដល់ឈ្នួញទិញលក់ដី សូមកុំទៅទិញដីនៅតាមបណ្ដោយគម្រោងព្រែកជីកហ្វូណនតេជោ ដែលនាំឱ្យរដ្ឋាភិបាលពិបាកក្នុងការដោះស្រាយ នៅពេលអនុវត្តគម្រោងព្រែកជីកហ្វូណនតេជោនេះ។
-សម្តេចធិបតី ថ្លែងបញ្ជាក់សារជាថ្មីថា គម្រោងព្រែកជីកហ្វូណនតេជោនឹងបើកការដ្ឋានសាងសង់នៅថ្ងៃទី៥ ខែសីហា ឆ្នាំ ២០២៤ តែម្ដង។
-សម្ដេចធិបតី ថ្លែងថា បើស្រឡាញ់ជាតិពិតប្រាកដ ចង់បានឯករាជ្យ ភាពក្នុងវិស័យដឹកជញ្ជូន ចង់ឃើញស្នាដៃប្រវត្តិសាស្ត្ររបស់អ្នកជំនាន់នេះ សូមរួមគ្នាជាកម្លាំងជាតិ គាំទ្រគម្រោងព្រែកជីកហ្វូណនតេជោទាំងអស់គ្នា។
-សម្ដេចធិបតី ក៏បានថ្លែងអំពាវនាវដល់បុគ្គលមួយចំនួន តូច សូមកុំបង្កការរាំងស្ទះដល់គម្រោងព្រែកជីកហ្វូណនតេជោ ដែលបម្រើដល់ផលប្រយោជន៍ជាតិ ទាំងស្រុង។
-សម្តេចធិបតី ថ្លែងអំពាវនាវដល់ប្រជាពលរដ្ឋបន្តរួមគ្នាគាំទ្រគម្រោងព្រែកជីកហ្វូណនតេជោ និងរួមគ្នាប្រឆាំងរាល់បុគ្គលណាដែលមានបំណងធ្វើវិទ្ធង្សនា ធ្វើឱ្យរាំងស្ទះដល់គម្រោងព្រែកជីកនេះ។
-សម្ដេចធិបតី សម្រេចមិនអនុញ្ញាតឱ្យមានការសាងសង់ព្រលានយន្តហោះនៅកំពតនោះឡើយ ដោយសារមានព្រលាននៅខេត្តព្រះសីហនុរួចហើយ និងបញ្ជៀ សការចំណាយមិនសមស្រប។
-សម្តចធិបតី ថ្លែងថា ដើម្បីឱ្យប្រទេសកម្ពុជាក្លាយជាប្រទេសដែលមានជីវភាពចំណូលកម្រិតខ្ពស់ទាល់តែចំណូលរបស់ខេត្តនីមួយៗក៏ដូចជារាជធានីខេត្តនីមួយៗបូកបញ្ចូលគ្នាហើយខេត្តនីមួយៗមានចំណូលកម្រិតខ្ពស់មានន័យថាប្រជាពលរដ្ឋដែលរស់នៅក្នុងរាជធានីខេត្តនីមួយៗមានចំណូលកាន់តែកើនឡើងទើបធ្វើឱ្យប្រទេសក្លាយទៅជាប្រទេសដែលមានចំណូលខ្ពស់នៅឆ្នាំ២០៥០ ។
សូមជម្រាបជូនថា កំពង់ផែពហុបំណងកំពតនេះ មានទីតាំងស្ថិតនៅភូមិគីឡូ១២ សង្កាត់កោះតូច និងសង្កាត់បឹងទូក ក្រុងបូកគោ ខេត្តកំពត ត្រូវបានរាជរដ្ឋាភិបាលអនុញ្ញាតឱ្យបង្កើតឡើងអំឡុងឆ្នាំ២០០៥ និងត្រូវបានក្រសួងសាធារណការ និងដឹកជញ្ជូនអនុញ្ញាត ឱ្យអភិវឌ្ឍសាងសង់ហេដ្ឋារចនាសម្ព័ន្ធកំពង់ផែនៅអំឡុងឆ្នាំ២០១២ នៅលើផ្ទៃដីទំហំសរុប២០៧ហិកតា ដែលជាកម្មសិទ្ធិរបស់ក្រុមហ៊ុនកំពតផត។
បេីយោងតាមរបាយការណ៍របស់លោក ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន បានឱ្យដឹងថា គម្រោងអភិវឌ្ឍន៍កំពង់ផែពហុបំណងកំពត នៅក្នុងដំណាក់កាលទី១ បានបញ្ចប់ការសាងសង់ជាស្ថាពរស្របតាមលក្ខណៈបច្ចេកទេសនូវហេដ្ឋារចនាសម្ព័ន្ធរូបវន្តសំខាន់ៗ រួមមាន៖ ចំណតនាវា ដែលមានបង្គោលចងពួរសម្រាប់នាវាចូលចតអែបចំណតនាវា និងរបាំងការ ពារការប៉ះទង្គិចនាវា ការសាងសង់ទីលានកុងតឺន័រ ឃ្លាំងស្តុកទំនិញ អគារត្រួតពិនិត្យទំនិញ ការសាងសង់ច្រកទ្វារចូល-ចេញផ្នែកខាងមុខមានរបាំងប៉ុស្តិ៍យាមហ៊ុមព័ទ្ធដោយរបងជុំវិញ និងរោងម៉ាស៊ីនភ្លើងចំនួន២កន្លែង រួមទាំងការសាងសង់អគាររដ្ឋបាលកម្ពស់៣ជាន់ សម្រាប់ជាការិយាល័យបំពេញការងាររបស់បុគ្គលិកកំពង់ផែ មន្ត្រីគយ និងរដ្ឋាករកម្ពុជា មន្ត្រីសុខាភិបាល មន្ត្រីអន្តោប្រវេសន៍ និងការិយាល័យរបស់មន្ត្រីមេបញ្ជាការផែ និងកណ្ណធារ និងការរៀបចំត្រៀមនូវបន្ទប់សម្រាប់ប្រើប្រាស់ជាមណ្ឌលត្រួតពិនិត្យចរាចរណ៍នាវា ដែលធ្វើប្រតិបត្តិការចូល-ចេញតាមផ្លូវទឹកផងដែរ។
គម្រោងអភិវឌ្ឍន៍កំពង់ផែពហុបំណងកំពត ដំណាក់កាលទី១នេះ បានចំណាយថវិកាសាងសង់សរុបប្រមាណ ១៤០ លានដុល្លារអាម៉េរិក ដែលជាទុនវិនិយោគរបស់ក្រុមហ៊ុនកំពតផត។
រដ្ឋមន្ត្រីក្រសួងសាធារណការ បានថ្លែងថា កំពង់ផែពហុបំណងកំពតនេះ ត្រូវបានរំពឹងថានឹងក្លាយជាសរសៃឈាមដ៏សំខាន់សម្រាប់ការដឹកជញ្ជូនតាមផ្លូវសមុទ្ររបស់កម្ពុជា ដែលនឹងចូលរួមចំណែកជំរុញសេដ្ឋកិច្ចកម្ពុជា ឱ្យមានកំណើនបន្ថែមទៀត ហើយនឹងក្លាយជាកំពង់ផែទឹកជ្រៅមួយបន្ថែមទៀតរបស់កម្ពុជាដែលនឹងជួយបំពេញបន្ថែមឱ្យកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ។
បន្ថែមពីនេះ ការដឹកជញ្ជូនតាមផ្លូវសមុទ្រពីកំពង់ផែពហុបំណងកំពត ទៅកាន់ប្រទេសក្នុងតំបន់អាស៊ីប៉ាស៊ីហ្វិក អាចដំណើរការទៅបាន ដោយពុំចាំបាច់ប្តូរនាវានៅកំពង់ផែណាមួយឡើយ លើកលែងតែការ ដឹកជញ្ជូនទំនិញទៅកាន់សហរដ្ឋអាមេរិក និងអឺរ៉ុប ដែលតម្រូវឱ្យប្តូរនាវានៅកំពង់ផែធំៗ មុននឹងទៅដល់គោលដៅចុងក្រោយ ជាដើម៕ដោយ៖ស តារា
