ភ្នំពេញ ៖ បុរសវ័យចំណាស់ម្នាក់បានបេីករថយន្តហាយលែនឌ័រដឹកចៅទៅសាលារៀន តែងងឹតមុខតាមផ្លូវក៏រេចង្កូតទៅចិញ្ចេីមផ្លូវបុកបង្គោលភ្លេីងបណ្ដាលឲ្យរងការខូចខាតយ៉ាងដំណំ ។ ហេតុការណ៍នេះបានកេីតឡេីងកាលពីវេលាម៉ោង៦ និង៥០នាទីព្រឹក ថ្ងៃទី១១ ខែមិថុនា ឆ្នាំ២០២៤ នៅតាមបណ្ដោយផ្លូវជាតិលេខ២ ក្នុងសង្កាត់ព្រែកកំពិស ខណ្ឌដង្កោ រាជធានីភ្នំពេញ ។
បេីតាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុនោះ គេឃេីញរថយន្តម៉ាក Toyota ហាយលែនឌ័រ ពណ៌ទឹកមាស ពាក់ផ្លាកលេខ ភ្នំពេញ2AM-5193 បានធ្វេីដំណេីរតាមបណ្ដោយផ្លូវជាតិលេខ២ ទិសដៅពីលិចទៅកេីតក្នុងល្បឿនលឿនល្មម ខណៈមកដល់ចំណុចកេីតហេតុក៏រេចង្កូតមកស្ដាំដៃឡេីងខឿនទៅបុកបង្គោលថ្ម(បង្គោលភ្លេីង)ពេញទំហឹង បណ្ដាលឲ្យរថយន្តរងការខូចខាតកាង ,ស្ទុប បែកកង់ចំហៀងខាងស្ដាំយ៉ាងដំណំ តែបង្គោលភ្លេីងមិនរងការខូចខាតនោះទេ ព្រមទាំងមិនបង្កគ្រោះថ្នាក់ដល់មនុស្សណាម្នាក់ផងដែរ ។
ប្រភពដដែលបានបន្ថែមថា ករណីនេះ អ្នកបេីកបរគឺជាបុរសវ័យចំណាស់ជាជនជាតិខ្មែរ ដោយបានដឹកចៅទៅសាលារៀន ខណៈកំពុងធ្វេីដំណេីរតៃកុងមានសភាពងងឹតមុខទេីបរេចង្កូតមកស្ដាំដៃបុកបង្គោលភ្លេីងដូច្នេះ ។
ក្រោយកេីតហេតុនោះ គេឃេីញវត្តមានសមត្ថកិច្ចមូលដ្ឋានបានចុះទៅដល់កន្លែងកេីតហេតុផងដែរ និងបានពិនិត្យស្ថានភាពត្រង់ចំណុចកេីតហេតុដោយឃេីញថាមិនប៉ះពាល់ដល់មនុស្ស ឬខូចខាតទ្រព្យសម្បត្តិរដ្ឋ និងបង្គោលភ្លេីង ទេីបសមត្ថកិច្ចមូលដ្ឋានអនុញ្ញាតិឲ្យម្ចាស់ហៅរថយន្តស្ទួចមកស្ទួចរថយន្តបង្កទៅជួសជុលដោយខ្លួនឯង ៕ ដោយ ៖ ភារ៉ា ដង្កោ
