ខេត្តស្វាយរៀង:សមត្ថកិច្ចបញ្ជូនជនសង្ស័យ១៤នាក់ ទៅតុលាការពាក់ព័ន្ធករណីជួញដូរគ្រឿងញៀន ដកហូតបានវត្ថុតាងគ្រឿងញៀនសរុបជាង៣គីឡូក្រាម និងអាវុធ៤ដើម នៅក្រុងបាវិត។
លោកឧត្តមសេនីយ៍ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន បានអោយដឹងនៅថ្ងៃទី១៦ខែមិថុនាឆ្នាំ២០២៤ នេះថា ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ពេជ្រ វីរៈ ស្នងការនគរបាលខេត្ត រូបលោកបានដឹកនាំប្រតិបត្តិការនេះផ្ទាល់ នៅថ្ងៃទី១២ ខែមិថុនា ឆ្នាំ២០២៤ ក្រោមការសម្របសម្រួលពីលោក ឡម ពេងស៊ាន ព្រះរាជអាជ្ញារងខេត្ត កម្លាំងជំនាញការិយាល័យប្រឆាំងគ្រឿងញៀនខេត្តដឹកនាំដោយលោកវរសេនីយ៍ឯក កាន កេន នាយការិយាល័យ សហការជាមួយកម្លាំងអធិការដ្ឋាននគរបាលក្រុងបាវិត ដឹកនាំដោយលោកវរសេនីយ៍ទោ អែម សុវណ្ណារិទ្ធិ អធិការនគរបាលក្រុងបាវិត បានបើកប្រតិបត្តិការបង្ក្រាបករណីជួញដូរ រក្សាទុក ប្រើប្រាស់ដោយខុសច្បាប់នូវសារធាតុញៀន និងកាន់កាប់រក្សាទុកអាវុធ គ្រាប់រំសេវដោយគ្មានការអបុញ្ញាតិនៅចំណុចបន្ទប់ជួល ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។
ជាលទ្ធផលនៃប្រតិបត្តិការ ឃាត់ខ្លួនជនសង្ស័យជនជាតិវៀតណាមចំនួន១៤នាក់ និងជនជាតិខ្មែរម្នាក់ ដកហូតបានថ្នាំញៀនប្រភេទមេតំហ្វេតាមីនទម្ងន់១១៣.០៣ក្រាម, ថ្នាំញៀនប្រភេទកេតាមីន ទម្ងន់១៥៨៩.៤៩ក្រាម, ថ្នាំញៀនប្រភេទអុិចស្តាសុី ទម្ងន់១៣៥៤.៨៩ក្រាម សរុបសារធាតុញៀនទម្ងន់៣០៦៦.៤១ក្រាម(៣គីឡូ៦៦.៤១ក្រាម), អាវុធខ្លីចំនួន៣ដើម បង់៣ គ្រាប់៦៤គ្រាប់, អាវុធវែងកែឆ្នៃ១ដើម, ជញ្ជីងថ្លឺងថ្នាំញៀន១គ្រឿង, ទូរស័ព្ទដៃ១៥គ្រឿង, រថយន្ត១គ្រឿង, ម៉ូតូ៣គ្រឿង, លិខិតឆ្លងដែន៥ក្បាល, ដាវសារ៉ៃ២ ព្រមទាំងឧបករណ៍ សម្ភារវេចខ្ចប់ និងប្រើប្រាស់គ្រឿងញៀនមួយចំនួនទៀត។
