ខេត្តកណ្តាល៖ ប្រជាពលរដ្ឋក្រុងតាខ្មៅសហការជាមួយជនរងគ្រោះដេញតាមប្រម៉ាញ់ចាប់ខ្លួនចោរកាច់កម៉ូតូម្នាក់ស្វាគមន៍រហូតរបួសធ្ងន់ បន្ទាប់ពីបុរសជាចោររូបនេះធ្វើសកម្មភាពកាច់កម៉ូតូប្រជាពលរដ្ឋមួយគ្រឿង កាលពីវេលាម៉ោង១១ និង៥០នាទីព្រឹកថ្ងៃទី២៨ ខែកក្កដា ឆ្នាំ២០១៦ ស្ថិតក្នុងភូមិព្រែកអញ្ចាញ សង្កាត់ព្រែកឫស្សី ក្រុងតាខ្មៅ ខេត្ដកណ្ដាល ។

មន្រ្ដីនគរបាលក្រុងតាខ្មៅបានឲ្យដឹងថា ចោរកាច់កម៉ូតូដែលត្រូវបានប្រជាពលរដ្ឋឃាត់ខ្លួនឈ្មោះ សុខ ចាន់ ភេទប្រុស អាយុ៣៣ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិព្រែកអញ្ចាញ ឃុំព្រែកអញ្ចាញ ស្រុកមុខកំពូល ខេត្ដកណ្ដាល ។ ចំណែកឯជនរងគ្រោះឈ្មោះ ស៊ុត សុផាន់និត ភេទប្រុស អាយុ១៨ឆ្នាំ ជនជាតិខ្មែរ មុខរបរសិស្ស មានទីលំនៅភូមិព្រែកកាត់ សង្កាត់តាក្ដុល ក្រុងតាខ្មៅ ជាម្ចាស់ម៉ូតូម៉ាកហុងដាស្កុបពី ស៊េរីឆ្នាំ២០១៤ ពណ៌ក្រហម ពាក់ស្លាកលេខភ្នំពេញ1AC-4718 ។

ជនសង្ស័យបានសារភាពថា ខ្លួនពិតជាបានធ្វើសកម្មភាពកាច់កម៉ូតូជនរងគ្រោះពិតប្រាកដមែន ។ ជនសង្ស័យបញ្ជាក់ថា ខ្លួននិងបក្ខពួកម្នាក់ទៀតធ្លាប់បានធ្វើសកម្មភាពកាច់សោ.កម៉ូតូបានសម្រេច១លើកនៅម្ដុំជម្ពូវ័ន្ដក្រុងភ្នំពេញ ។ លុះមកដល់ថ្ងៃទី២៨ ខែកក្កដា ខ្លូននិងបក្ខពួកបានជិះម៉ូតូម៉ាកហុងដាSLចេញពីរាជធានីភ្នំពេញ រហូតដល់ចំណុចកើតហេតុខ្លួនក៏បានចុះពីលើម៉ូតូធ្វើសកម្មភាពកាច់កម៉ូតូជនរងគ្រោះជិះគេចខ្លួន តែគេចមិនរួចក៏ត្រូវប្រជាពលរដ្ឋក្របួចជាប់តែម្ដង ៕

ដោយ៖ ស្អាងជ័យ