ខេត្តកំពង់ស្ពឺ៖ បុរសម្នាក់ដេកស្លាប់លើគ្រែក្នុងផ្ទះរបស់ខ្លួនរហូតដល់ហើមស្អុយទៅហើយ ទើបកូនស្រីមក ឃើញហើយក៏រាយការណ៍ទៅសមត្ថកិច្ច ចុះពិនិត្យបង្កឱ្យមានការភ្ញាក់ផ្អើល។
ការភ្ញាក់ផ្អើលឃើញបុរសម្នាក់ដេកស្លាប់នេះកាលពីវេលាម៉ោង៧និង៣០នាទីព្រឹកថ្ងៃទី១៤ ខែកក្កដា ឆ្នាំ២០២៤ នៅក្នុងផ្ទះជនរងគ្រោះ ស្ថិតនៅក្នុងភូមិត្រពាំងអំពិល ឃុំត្រពាំងគង ស្រុកសំរោងទង ខេត្តកំពង់ស្ពឺ។
តាមការឱ្យដឹងពីនគរបាលស្រុកសំរោងទងថា មានករណីកូនស្រីបានប្រទះឃើញសាកសពឪពុកបានដេកស្លាប់នៅក្នុងផ្ទះ ហើយបានរាយការណ៍ទៅសមត្ថកិច្ច ជួយស្រាវជ្រាវរឿងពិតផង ។
នគរបាលស្រុកសំរោងទងបញ្ជាក់ថា សពជនរងគ្រោះ មានឈ្មោះសែម ហួត ភេទប្រុសអាយុ៤៧ឆ្នាំ រស់នៅក្នុងភូមិកើតហេតុខាងលើ ហើយបានដេកស្លាប់លើគ្រែ(នៅផ្ទះកើតហេតុ)។
នគរបាលបានបន្តទៀតថា បើតាមការបំភ្លឺពីឈ្មោះហួត គីមឆ័ង ភេទស្រីអាយុ ២០ឆ្នាំ (ត្រូវជាកូនសព) រស់នៅភូមិទម្លាប់ខ្ពស់ត្បូង ឃុំដំណាក់អំពិល ស្រុកអង្គស្នួល ខេត្តកណ្តាល បានបំភ្លឺថា នៅមុនពេលកើតហេតុ រូបខ្លួនបានចេញពីផ្ទះមកមើលឪពុក។ ពេលមកដល់ បានឃេីញឪពុកបានដេកស្លាប់នៅក្នុងផ្ទះ មានសភាពហើមស្អុយទៅហើយ។ កូនស្រីប្រាប់នគរបាលថា ឪពុករបស់ខ្លួន មានជំងឺប្រចាំកាយ គឺ(ជនរងគ្រោះមានជំងឺ លើសឈាម)។
ក្រោយមានការភ្ញាក់ផ្អើល នគរបាលជំនាញបានធ្វើការពិនិត្យលើសាកសពជាលទ្ធផលសពដែលស្លាប់នៅក្នុងផ្ទះ លើគ្រែជាប់ជញ្ជាំង មានសភាពហើមស្អុយ។
តាមការពិនិត្យរបស់លោកវេជ្ជបណ្ឌិត លាភ សោភ័ណ្ឌ គ្រូពេទ្យកោសល្យវិច្ច័យខេត្តកំពង់ស្ពឺ ជនរងគ្រោះស្លាប់ដោយសារគាំងបេះដូង ។
បច្ចុប្បន្នសពជនរងគ្រោះត្រូវបានប្រគល់ជូនក្រុមគ្រួសារយកធ្វើបុណ្យតាមប្រពៃណី ៕
