ភ្នំពេញ ៖ អគ្គិភ័យឆាបឆេះជាន់ទី១ ក្នុងសង្កាត់អូរឬស្សីទី១ បង្កការខូចខាតផ្ទះស្ទើរទាំងស្រុង រួមជាមួយនឹងសម្ភារៈមួយចំនួនផងដែរ តែមិនបានអោយរាលដាល ឬ នរណារងរបួសនោះឡើយ ។

គ្រោះអគ្គិភ័យខាងលើនេះ បង្កភ្ញាក់ផ្អើលនាវេលាម៉ោង ១០ នឹង ៤៥នាទីព្រឹកថ្ងៃទី ១៥ ខែកក្កដា ឆ្នាំ២០២៤ នៅចំណុចផ្ទះជាន់ទី០១ តាមបណ្តោយផ្លូវ ១៧០ ក្នុងសង្កាត់អូរឫស្សីទី០១ ខណ្ឌ៧មករា រាជធានីភ្នំពេញ ។

បើតាមប្រភពព័ត៌មានពីប្រជាពលរដ្ឋក្បែរខាងបានអោយដឹងថា គេធុំក្លិនឈ្ងៀមចេញពីផ្ទះកើតហេតុ នឹងមានលាយឡំផ្សែងហ៊ុយខ្មៅឃ្មួលឃ្មាញ់ ហ៊ុយចេញមកក្រៅ ។ ភ្លាមៗ ក៏មានសម្លេងស្រែកចេញពីខាងក្នុងផ្ទះដែលឆាបឆេះ ទើបបង្កឱ្យមានការឆោរឡោរដល់ប្រជាពលរដ្ឋ រាយការណ៍ជូននឹងសមត្ថកិច្ច ដើម្បីឱ្យសមត្ថកិច្ចជួយបន្តទាក់ទង ទៅមន្រ្តីជំនាញបង្ការនឹងពន្លត់អគ្គិភ័យ មកជួយអន្តរាគមន៏បាញ់ពន្លត់ជៀសវាងមានការរាលដាល ។

ភ្លាមៗនោះដែរ ក៏ឃើញមានវត្តមាន លោក ថេង សុថុល អភិបាលខណ្ឌ៧មករា រួមជាមួយនឹងមន្រ្តីក្រោមបានចុះមកត្រួតពិនិត្យផ្ទាល់នៅកន្លែងកើតហេតុផងដែរ ។

អគ្គិភ័យខាងលើបានឆាបឆេះផ្ទះជាន់ទី០១ប្រភេទថ្មបេតុង ត្រូវបានឆាបឆេះស្ទើរទាំងស្រុង រួមជាមួយសម្ភារៈមួយចំនួនផងដែរ តែមិនបង្កឱ្យនរណារងរបួសនោះឡើយ នឹងមិនមានការដាលដល់ផ្ទះដទៃនោះឡើយ ។ ហើយក្នុងប្រតិបត្តិការណ៍ខាងលើនេះដែរ រថយន្តបង្ការនឹងពន្លត់អគ្កិភ័យ នៃស្នងការដ្ឋាននគរបាលរាជធានីភ្នំពេញ មកដល់ទីតាំងចំនួន០៨គ្រឿង នឹងរថយន្តពន្លត់របស់ទីក្រុងអូឡាំព្យា ចំនួន០២គ្រឿង ប្រើប្រាស់ទឹកអស់ចំនួន០៥គ្រឿង បាញ់រលត់ជាស្ថាពរ ។ ចំពោះមូលហេតុ សមត្ថកិច្ចកំពុងធ្វើការស្រាវជ្រាវ ៕