ភ្នំពេញ ៖ បុរសម្នាក់បានបេីករថយន្តឃ្លុប ម៉ាក ហុីយ៉ាន់ដាយ មួយគ្រឿង មិនប្រយ័ត្នបានបុកនិងកិនម៉ូតូមួយគ្រឿងទៀតអូសជាច្រេីនម៉ែត្ររងការខូចខាតយ៉ាងដំណំ និងបណ្ដាលឲ្យអ្នកជិះម៉ូតូរងរបួសរលាត់ខ្លួនប្រាណផងដែរ ។ ហេតុការណ៍គ្រោះថ្នាក់ចរាចរណ៍នេះបានកេីតឡេីងកាលពីវេលាម៉ោង១០ និង៤០នាទីព្រឹក ថ្ងៃទី១៨ ខែកក្កដា ឆ្នាំ ២០២៤ នៅចំណុចស្ទុបវត្តឬស្សីសាញ់ តាមបណ្ដោយផ្លូវ៥០ម៉ែត្រ កែងផ្លូវបេតុងព្រៃស ស្ថិតក្នុងភូមិប្រការ សង្កាត់ព្រៃស ខណ្ឌដង្កោ រាជធានីភ្នំពេញ ។

អ្នកបេីកម៉ូតូរងគ្រោះមានឈ្មោះ ម៉ែន ម៉ាប់ ភេទប្រុស អាយុ៥៥ឆ្នាំ មុខរបរជាសន្តិសុខនៅក្រុមហ៊ុនស្រាបៀរកម្ពុជា ស្នាក់នៅភូមិព្រែជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។ រីឯអ្នកបេីករថយន្តបង្កមិនបង្ហេីបប្រាប់អត្តសញ្ញាណនោះទេ ។
តាមសម្ដីអ្នកបេីកម៉ូតូម៉ាក ហុងដាវេវ ពណ៌ក្រហម ពាក់ផ្លាកលេខ ភ្នំពេញ 1GO-1585 បានធ្វេីដំណេីរតាមបណ្ដោយផ្លូវ៥០ម៉ែត្រ ទិសដៅពីជេីងទៅត្បូង និងមកដល់ស្ទុបវត្តឬស្សីសាញ់ក៏ឈប់ចាំស្ទុប ។ លុះពេលស្ទុបលោតពណ៌ខៀវវិញក៏ធ្វេីដំណេីរទៅមុខស្រាប់តែត្រូវរថយន្តម៉ាកហុីយ៉ាន់ដាយ ប្រភេទរថយន្តឃ្លុប ពណ៌ស ពាក់ផ្លាកលេខ ភ្នំពេញ 3D-5134 បានធ្វេីដំណេីរតាមបណ្ដោយផ្លូវបេតុងព្រៃស ទិសដៅពីកេីតលិចមកកេីត រួចបានបុកម៉ូតូជនរងគ្រោះពីចំហៀងពេញទំហឹង ធ្វេីឲ្យបុរសម្នាក់ម្ចាស់ម៉ូតូដួលខ្ទាតមកចិញ្ចេីមផ្លូវរងរបួសរលាត់ខ្លួនប្រាណ ។ រីឯម៉ូតូនៅក្រោមរថយន្តបង្កអូសប្រហែល១០ម៉ែត្រទេីបឈប់ ។
ក្រោយកេីតហេតុ ភាគីទាំងពីរបានធ្វេីការចចារគ្នាដែរតែមិនត្រូវរូវ ទេីបសមត្ថកិច្ចមូលដ្ឋានផ្នែកចរាចរណ៍ ចុះមកធ្វេីការវាស់វែងយករថយន្ត និងម៉ូតូទៅរក្សាទុកនៅអធិការដ្ឋាននគរបាលខណ្ឌដង្កោ ជាបណ្ដោះអាសន្នរង់ចាំដោះស្រាយគ្នាបន្តនាពេលក្រោយ ៕ ដោយ ៖ ភារ៉ា ដង្កោ