ខេត្តកណ្ដាល៖ ក្មេងទំនើង២នាក់ក្នុងចំណោមបក្ខពួក៦នាក់ ត្រូវបានសមត្ថកិច្ចឃាត់ខ្លួន បន្ទាប់ពីក្រុមក្មេងទំនើងទាំងនោះ បង្ហោះម៉ូតូយ៉ាងអនាធិបតេយ្យ និងថតវីដេអូបង្ហោះតាមបណ្ដាញសង្គមហ្វេសប៊ុកទៀតផង កាលពីថ្ងៃទី១៥ ខែកក្កដា ឆ្នាំ២០២៤ ម៉ោង១៤និង៣០នាទី នៅចំណុចតាមផ្លូវក្រវ៉ាត់ក្រុងទី៣ ភូមិទួលក្រសាំង សង្កាត់រកាខ្ពស់ ក្រុងតាខ្មៅ ខេត្តកណ្តាល ។

មន្ត្រីនគរបាលក្រុងតាខ្មៅបានឲ្យដឹងថា ក្រុមក្មេងទំនើង០៦នាក់៖ ឃាត់ខ្លួនបាន២នាក់ ១-ឈ្មោះជួប រតនៈដេតវិសាល ភេទប្រុស អាយុ១៦ឆ្នាំ ជនជាតិខ្មែរ ទីលំនៅភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មុខរបរនៅផ្ទះ(ឃាត់ខ្លួន) ធ្លាប់ជាប់ពន្ធនាគារខេត្តកណ្តាលរយៈពេល១ឆ្នាំករណីធ្វើឲ្យខូចខាតដោយចេតនា(បង្ករឡើងដោយក្មេងទំនើង)។ ២-ឈ្មោះ ហួរ សុអមរិន្ទ ភេទប្រុស អាយុ១៥ឆ្នាំ មុខរបរសិស្ស មានទីលំនៅភូមិដើមមៀន សង្កាត់ដើមមៀន ក្រុងតាខ្មៅ ខេត្តកណ្តាល (ឃាត់ខ្លួន)។ចំណែកបក្ខពួក៤នាក់ទៀត គេចខ្លួន ។ វត្ថុតាងចាប់យក៖ ម៉ូតូមួយគ្រឿងម៉ាកSuzuki nex សេរី២០២៤ពណ៌សខៀវ ស្លាកលេខភ្នំពេញ១KU០០៩០(របស់ឈ្មោះជួបរតនៈដេតវិសាល)។
ក្មេងទំនើងដែលឃាឃាត់ខ្លួនបាន ត្រូវបានសមត្ថកិច្ច ក្រុងតាខ្មៅ កសាងសំណុំរឿងចាត់ការតាមនីតិវិធី៕