ដោយយោងទៅតាមការស្ទង់មតិថ្មីមួយបានឱ្យដឹងថាពាណិជ្ជកម្មជប៉ុននៅក្នុង ប្រទេសថៃបានមើលឃើញពីសញ្ញាសេដ្ឋ កិច្ចដែលមានភាពប្រសើរឡើងនៅក្នុងពាក់កណ្តាលទី១នៃឆ្នាំ២០១៦នេះ ហើយបានរំពឹងថានឹងមានភាពល្អប្រសើរបន្តទៀតនៅពាក់កណ្តាលទី២នេះ។

ប៉ុន្តែក្រុមហ៊ុនជប៉ុនភាគច្រើននៅតែស្ទាក់ស្ទើរបង្កើនការវិនិយោគដដែលចំពេលដែលមានបញ្ហាដូចជាភាពស្ទួនគ្នានៅក្នុងដំណើរការគយតម្លៃប្រេងធ្លាក់ចុះនិងខ្វះ កម្លាំងពលកម្មជាដើម។

ដោយយោងទៅតាមលោក Hiroki Mitsumata ប្រធានស្ថាប័នពាណិជ្ជកម្មផ្ទៃក្នុងជប៉ុននិងជាប្រធានដឹកនាំការស្ទង់មតិនេះបានឱ្យដឹងថា ក្រុមហ៊ុន៣៣ភាគរយនឹងបង្កើនការវិនិយោគបន្ថែមទៀតនៅក្នុង ប្រទេសថៃ៣៥ភាគរយនឹងកាត់បន្ថយការ វិនិយោគរបស់ពួកគេ ហើយ២៧ភាគរយ នឹងរក្សាកម្រិតពាណិជ្ជកម្មដូចបច្ចុប្បន្ននេះ។

លោក Mitsumata បានមានប្រសា សន៍ថា តាមរយៈតួលេខទាំងនោះយើង មិនអាចនិយាយដោយផ្ទាល់ថាពួកគេនឹងចាកចេញពីប្រទេសថៃនោះទេ។

លោកបានបន្តទៀតថា អ្វីដែលខ្ញុំអាច និយាយប្រាប់អ្នកពីការស្ទង់មតិនេះគឺថាពួកគេកំពុងតែពិចារណាចំពោះជំហរនៃការវិនិយោគរបស់ពួកគេ។ ប្រសិនបើពួកគេមិនបង្កើតសមត្ថភាពឱ្យពេញលេញទេនោះ ពួកគេនឹងពិចារណាចំពោះការកាត់បន្ថយនូវការវិនិយោគរបស់ពួកគេដើម្បីអនុវត្ត តាមស្ថានភាពទីផ្សារ។

សូមបញ្ជាក់ថា ការស្ទង់មតិនេះត្រូវបានធ្វើឡើងនៅចន្លោះថ្ងៃទី២៣ ខែឧសភា និងថ្ងៃទី១៥ ខែមិថុនា ជាមួយនឹងក្រុមហ៊ុន ជប៉ុនប្រមាណជា១.៧០៥ក្រុមហ៊ុននៅ ក្នុងប្រទេសថៃ។

លោក Mitsumata បានមានប្រសា សន៍ថាខណៈដែលវិស័យអាហារ សម្លៀកបំពាក់និងវិស័យគីមីកំពុងតែមានសកម្ម ភាពល្អនោះ ទស្សនវិស័យទៅលើវិស័យ ដែកម៉ាស៊ីននិងរថយន្តនៅតែធ្លាក់ចុះ ដដែល។

លោកបានបន្ថែមទៀតថា សកម្មភាពនៃការនាំចេញមានរូបភាពដូចគ្នាដោយ ការនាំចេញអាហារ សម្លៀកបំពាក់ និងគីមីមានសកម្មភាពល្អខណៈដែលវិស័យយានយន្ត និងដែកមិនសូវល្អ៕

ដោយ៖ រ័ត្ន