ភ្នំពេញ៖ តារាចម្រៀងប្រុសស្រីល្បីឈ្មោះប្រចាំផលិតកម្មហង្សមាសគឺកញ្ញា ឱក សុគន្ធកញ្ញា និងលោក ឆន សុវណ្ណរាជ ធ្លាប់ត្រូវបានទស្សនិកជនអ្នកគាំទ្រមួយចំនួនបានផ្គូរផ្គង និងចង់ឲ្យពួកគេក្លាយជាគូស្នេហ៍ក្រៅឆាក។ ទោះបីជាធ្លាប់បញ្ជាក់អំពីអារម្មណ៍ថា មិនមានស្នេហានឹងគ្នា ប៉ុន្តែមួយរយៈចុងក្រោយនេះគេសង្កេតឃើញអ្នកទាំងពីរតែងធ្វើដំណើរជាមួយគ្នាជាញឹកញាប់ ហើយរហូតពេលខ្លះពួកគេបានជិះរថយន្តជាមួយគ្នាផងដែរ។
ក្រោយបែកពីអតីតសង្សាជាតន្ត្រីករ ឱក សុគន្ធកញ្ញា នៅមិនទាន់បង្ហាញមុខសង្សាថ្មីនោះទេ បើទោះបីជាកន្លងទៅមានបុរសជាច្រើនតាមស្នេហ៍ពីលោក រ៉េត ធីដូណា ក្តី ប៉ុន្តែការស្និទ្ធស្នាលប្លែកជាមួយនឹងតារារួមដំបូល លោក ឆន សុវណ្ណរាជ បានធ្វើឲ្យគេកើតការសង្ស័យជាថ្មីថា ពួកគេអាចនឹងលេចចេញការផ្តើមស្នេហ៍ក្រៅឆាក។ ជាកស្តែងកន្លងទៅថ្មីៗនេះក្នុងពិធីសម្ពោធហាងរបស់តារាចម្រៀង ខាត់ជេម គេសង្កេតឃើញអ្នកទាំងពីល្អូកល្អឺននឹងគ្នាគួរឲ្យចាប់អារម្មណ៍ដែលសូម្បីតែរថយន្តក៏ពួកគេរួមដំណើរជាមួយគ្នាដែរ។
ប្រភពពីអ្នកសិល្បៈលើកឡើងថា សុគន្ធកញ្ញា និង សុវណ្ណរាជ តែងរួមដំណើរទៅណាមកណាជាមួយគ្នាជាញឹកញាប់ រហូតដល់មានអ្នកគាំទ្រពួកគេចង់ឲ្យអ្នកទាំងពីក្លាយជាសង្សានឹងគ្នាមិនត្រឹមតែនៅលើឆាក។ ប្រភពបន្តថាកន្លងមក កញ្ញា តែងបណ្តើរ សុវណ្ណារាជ ក្នុងន័យបញ្ចៀសភ្នែកទស្សនិកជន ខណៈដែលមានកូនប្រុសអ្នកមានទ្រព្យស្តុកតាមស្នេហ៍ច្រើន ហើយនាងក៏ចង់គេចេញពីការតាមស្នេហ៍ពីបុរសមួយចំនួនផងដែរ។
ប្រភពដដែលលើកឡើងដែរថា ឆន សុវណ្ណរាជ មិនទំនេរបេះដូងទេគឺលោកមានសង្សាម្នាក់ឈ្មោះ អារិយា ដែលជាអាណិកជនរស់នៅសហរដ្ឋអាមេរិក ប៉ុន្តែដោយសារតែមិនងាយជួបមុខគ្នាចំណងស្នេហ៍នេះអាចនឹងប្រែប្រួលគ្រាដែលញឹកញាប់គេតែងឃើញសុគន្ធកញ្ញា និង សុវណ្ណរាជ លេងឈុតឆាកស្នេហាលើឆាកជាញឹកញាប់។
នៅមិនទាន់អាចស្វែងរកការបញ្ជាក់ពីតារាចម្រៀងទាំងពីររូបខាងលើបាននៅឡើយទេ ។
គួរបញ្ជាក់ថា ឱក សុគន្ធកញ្ញា ក្រោយផ្តាច់ស្នេហ៍ចាស់តន្ត្រីករលោក រ៉េតធី ដូណា មកកាន់តែមានឈ្មោះល្បីជាមួយនឹងដំណឹងតាមស្នេហ៍ពីបុរសជាច្រើនដែលមានទាំងកូនមន្ត្រីធំៗ និងអ្នកជំនួញទ្រព្យស្តុកផងដែរ។ ខណៈដែល ឆន សុវណ្ណរាជ បានភ្ជាប់ទំនាក់ទំនងជាមួយនារីម្នាក់រស់នៅសហរដ្ឋអាមេរិកដែរ គេក៏នៅបន្តរងចាំទៀតថា តើចំណងស្នេហ៍ក្នុងសាច់រឿង និងបទចម្រៀងអាចនឹងកើតមានពិតនៅលើឆាកដែរឬយ៉ាងណា៕
ដោយ៖ វឌ្ឍនា
