ខេត្តពោធិ៍សាត់៖ កម្លាំងសមត្តកិច្ចនគរបាលស្រុកកណ្ដៀងឃាត់ខ្លួនជនសង្ស័យមុខសញ្ញាចោរលួចកាបូបលុយនិងទូរស័ព្ទដៃ៣នាក់ កសាងសំណុំរឿងបញ្ជូនទៅការិយាល័យជំនាញនៃស្នងការខេត្តចាត់ការបន្ត។
ការឃាត់ខ្លួនមុខសញ្ញាជនសង្ស័យចោរលួចខាងលើនេះបានអនុវត្តឡើងកាលពីវេលាម៉ោង១០យប់ថ្ងៃទី០២ ខែសីហា ឆ្នាំ២០១៦ នៅក្នុងអធិការដ្ឋាននគរបាលស្រុកកណ្ដៀង បន្ទាប់ពីហៅពួកគេមកសួរនាំ។
ប្រភពព័ត៌មានពីកម្លាំងសមត្តកិច្ចបានឲ្យដឹងថា មុខសញ្ញាសង្ស័យត្រូវបានឃាត់ខ្លួនទី១-ឈ្មោះ កែវ សុខជា ភេទប្រុស អាយុ២២ឆ្នាំ ទី២-ឈ្មោះ សុឹម ញាវ ភេទប្រុស អាយុ២៤ឆ្នាំ អ្នកទាំងពីនាក់នេះមានទីលំនៅភូមិទួលពង្រ ឃុំវាល ស្រុកកណ្ដៀង ខេត្តពោធិ៍សាត់ និងទី៣-ឈ្មោះ ជា សុខហេង ភេទប្រុស អាយុ២៣ឆ្នាំ រស់នៅភូមិផ្លូវពោធិ៍វង្ស ឃុំស្វាយលួង ស្រុកកណ្ដៀង ខេត្តពោធិ៍សាត់។
ប្រភពបន្តថា ការឃាត់ខ្លួនជនសង្ស័យទាំង៣នាក់នេះធ្វើឡើងក្រោយពីទទួលពាក្យបណ្ដឹងពីឈ្មោះ ជឹម ផល្លា ភេទប្រុស អាយុ២៧ឆ្នាំ មានទីលំនៅភូមិស្វាយចំបក់ ឃុំស្វាយលួង ស្រុកកណ្ដៀងថាជនសង្ស័យទាំងនេះបានលួចកាបូបគាត់ ក្នុងកាបូបនោះមានលុយចំនួន ១១៥.០០០រៀល លុះនៅយប់ដដែលនោះពួកគេបានបន្តធ្វើសកម្មភាពលួចកាបូបឈ្មោះ កែវ សុីគឿម ភេទប្រុស អាយុ៣៥ឆ្នាំ រស់នៅភូមិផ្លូវពោធិ៍វង្ស ឃុំស្វាយលួង ស្រុកកណ្ដៀង ដែលក្នុងកាបូបនោះមានលុយចំនួន ២០០.០០០រៀលនិងទូរស័ព្ទដៃ១គ្រឿង ។
ប្រភពដដែលអះអាងបន្តទៀតថា ចំពោះជនសង្ស័យទាំងបីនាក់នេះជាមុខសញ្ញាដែលតែងតែធ្វើសកម្មភាពលួចទ្រព្យសម្បត្តិនៅក្នុងមូលឋានឥតឈប់ឈរ ហើយកម្លាំងកំពុងបំពេញសំណុំបែបបទដើម្បីបញ្ជូនខ្លួនពួកគេទៅការិយាល័យជំនាញនៃស្នងការនគរបាលចាត់ការបន្តតាមនីតិវិធី៕
ដោយ៖ ប៉ឹម ពិន
