​ខខេត្តស្វាយរៀង៖ សមត្ថកិច្ច ឃាត់ជនសង្ស័យ៥នាក់ដែលពាក់ពន្ធ័ករណីឃាតកម្ម លើបុរសម្នាក់បណ្ដាលឱ្យស្លាប់ខណៈជនដៃដល់សមត្ថកិច្ចកំពុងតាមចាប់ខ្លួន។

យោងតាមសមត្ថកិច្ចនគរបាលបានឱ្យដឹងនារសៀលថ្ងៃទី៧ ខែកញ្ញា ឆ្នាំ២០២៤នេះ ថាជនរងគ្រោះមិនត្រូវបានស្គាល់ឈ្មោះនៅឡើយ (សង្ស័យជនជាតិចិន)  សម្បុរស កម្ពស់១,៧៥ម៉ែត្រ ។

ចំណែកជនសង្ស័យ ដែលពាក់ព័ន្ធមានឈ្មោះមានឈ្មោះ ១/រស់ វ៉ាន់សី
២/ឈ្មោះ ម៉ន អូន ៣/ឈ្មោះ ឈឿន យ៉េត ៤/ឈ្មោះ ហ៊ាន ប្រលឹង
និងទី៥/ឈ្មោះ   ម៉ុង ជីភាត់ (ជនជាតិភូមា) ត្រូវបានបញ្ជូនទៅការិយាល័យជំនាញខេត្ត ដើម្បី បន្តតាមច្បាប់ ។

ប្រភពបន្តថា ដើមហេតុនៃរឿង នៅវេលាម៉ោង​ ៧និង៤៥ នាទី ថ្ងៃទី០៦ ខែកញ្ញា  ឆ្នាំ២០២៤ ប៉ុស្តិ៍នគរបាលរដ្ឋបាលបាវិតបានទទួលព័ត៌មានពី រដ្ឋបាលក្រុមហ៊ុនកាស៊ីណូហ្គោដឡាក់២ បានរាយការណ៍មកថា  នៅចំនុចអាគារស្នាក់នៅរបស់ក្រុមហ៊ុន ស្ថិតក្នុងភូមិច្រកលាវ សង្កាត់បាវិត ក្រុងបាវិត ខេត្តស្វាយរៀង បុគ្គលិកដែលស្នាក់នៅ មានអាការ:មិនស្រួលខ្លួន ហើយក្រុមហ៊ុនបានយករថយន្តរបស់ក្រុមហ៊ុនដឹកយកទៅសង្គ្រោះនៅមន្ទីរពេទ្យ ខណ:ពេលដឹកចេញពីអគារស្នាក់នៅ អ្នកជម្ងឺក៏បានស្លាប់  ។

បន្ទាប់មករថយន្តរបស់ក្រុមហ៊ុន បានដឹកសាកសព យកមកតម្កល់ទុកនៅក្នុងបរិវេណវត្តពោធិ៍ថ្មី ស្ថិតក្នុងភូមិច្រកលាវ  សង្កាត់បាវិត ក្រុងបាវិត ខេត្តស្វាយរៀង ។

ប្រភពដដែលបន្តថាក្រោយពីទទួលបានព័តមានភ្លាម សមត្ថកិច្ចបានចុះទៅដល់កន្លែងកើតហេតុ និងធ្វើការចងខ្សែហ៊ុំព័ន្ធជុំវិញកន្លែងកើតហេតុ ដើម្បីរង់ចាំសមត្ថកិច្ចជំនាញ និងគ្រូពេទ្យ ដើម្បីពិនិត្យធ្វើកោសល្យវិច័យ ។

បន្ទាប់ពីទទួលបានព័ត៌មានខាងលើរួចមកនៅវេលាម៉ោង១០និង៤០នាទី លោកឧត្តមសេនីយ៍ទោស្នងការនគរបាលខេត្ត បានប្រគល់ភារកិច្ចជូនលោក គឹម ឡៃ ស្នងការរងជំនួយការដឹកនាំការិយាល័យនគរបាលព្រហ្មទណ្ឌកម្រិតធ្ងន់ ដឹកនាំកម្លាំងជំនាញការិយាល័យនគរបាលបច្ចេកទេសនិងវិទ្យាសាស្ត្រ  សហការជាមួយកម្លាំងជំនាញនៃអធិការដ្ឋាននគរបាលក្រុងបាវិត និងលោកវេជ្ជបណ្ឌិតធី សុភ័កត្រា  សមាជិកគណ:កម្មការកោសល្យវិច័យ នៃមន្ទីរពេទ្យបង្អែកជីភូ ដោយមានការសម្របសម្រួលនីតិវិធីពីលោក ឡម ពេងស៊ាន ព្រះរាជអាជ្ញារង នៃអយ្យការអមសាលាដំបូងខេត្តស្វាយរៀង បានចុះទៅពិនិត្យនិងស្រាវជ្រាវដល់កន្លែងកើតហេតុ។

សាកសព គេដាក់ឱ្យអង្គុយលើកៅអីខាងក្រោយក្នុងរថយន្តម៉ាកលុចហ្សីសRX350 ពណ៌ខ្មៅពាក់ផ្លាកលេខភ្នំពេញ2BR-3503 ពាក់អាវយឺតដៃខ្លីពណ៌ស ស្លៀកខោចង្កេះរឹតមានខ្សែរចងជើងខ្លី ដៃទាំងពីរដាក់លើពូកកៅអីរថយន្ដ ជើងស្ដាំបោះចូលក្រោមកៅអីខាងមុខផ្នែកខាងស្ដាំ ជើងឆ្វេងបត់ចុះក្រោមស្របនឹងកៅអីរថយន្ដ ក្នុងបរិវេណវត្តពោធិ៍ថ្មី(ហៅវត្តបាវិត)ស្ថិតក្នុងភូមិច្រកលាវ សង្កាត់បាវិតក្រុងបាវិតខេត្តស្វាយរៀង។

ប្រភពបន្ថែមថា ជាលទ្ធផលនៃការស្រាវជ្រាវលុះដល់ម៉ោងប្រហែល០៥និង៣០នាទីព្រឹក ខណៈពេលដែលខ្លួនកំពុងនៅបន្ទប់ សន្តិសុខខាងលើ បានដើរមកប្រាប់ខ្លួនថាៈជនជាតិចិន ដែលប្រធានក្រុមវាយយប់មិញ បានស្លាប់បាត់ហើយ ។

ឮដូច្នេះខ្លួនក៏ទៅមើលហើយបានឃើញជនជាតិភូមាចំនួនៈ០៣នាក់ប្រុសដែលជាអ្នកគ្រប់គ្រងផ្នែកសន្តិសុខនៅក្នុងក្រុមហ៊ុន គឺមាន៖
១/ឈ្មោះរ៉ួយ Ruyi
២/ឈ្មោះសួយ Shui
៣/ឈ្មោះហ្សែវ ហ្សែង Xian Qiang លើកជនជាតិចិនដែលស្លាប់ដាក់ចូលទៅក្នុងរថយន្តម៉ាកLEXUS 350 ពណ៏ខ្មៅ ផ្លាកលេខភ្នំពេញ2BR–3503 ហើយប្រាប់ថាដឹកទៅពេទ្យ ។

លុះប្រហែលដល់ម៉ោង៦ អ្នកទាំង០៣បានដឹកអ្នកស្លាប់មកក្រុមហ៊ុនវិញ ហើយប្រធានក្រុមជនជាតិចិនចំនួនៈ០៣នាក់
១/ឈ្មោះអាយ៉ុង A Yong
២/ឈ្មោះយ៉ាងយ៉ាង Yang Yang

៣/មិនស្គាល់ឈ្មោះ បានហៅខ្លួនឱ្យទៅជួប និងបានប្រាប់ខ្លួនឱ្យដឹកអ្នកស្លាប់ទៅដាក់ក្នុងវត្តពោធិ៏ថ្មី ហៅវត្តបាវិត ចាំឈ្មោះអាយ៉ុង ជាអ្នករាយការណ៍ប្រាប់សមត្ថកិច្ច ។

បន្ទាប់មក ឈ្មោះអាយ៉ុង បានឱ្យជនជាតិភូមាម្នាក់ទៀតប្រុស ខ្លួនមិនស្គាល់ឈ្មោះដែលជាចុងភៅក្នុងក្រុមហ៊ុន បើករថយន្តដឹកអ្នកស្លាប់នេះ ទៅជាមួយ ហើយនៅពេលសមត្ថកិច្ចសួរនាំឈ្មោះអាយ៉ុង បានបញ្ជាឱ្យខ្លួនឆ្លើយកុហកសមត្ថកិច្ចថា៖ អ្នកស្លាប់ដេកនៅក្នុងបន្ទប់ជាមួយខ្លួន ដេកនៅគ្រែពីលើខ្ញុំ ហើយឱ្យខ្លួននិយាយថាអ្នកស្លាប់ដេកធ្លាក់ពីលើគ្រែ រួចបញ្ជូនទៅពេទ្យស្លាប់ពាក់កណ្ដាលផ្លូវ ដោយឈ្មោះ អាយ៉ុង សន្យាឱ្យប្រាក់មកខ្លួនចំនួនៈ៥,០០០ដុល្លារអាមេរិច តែមិនទាន់ទទួលបានប្រាក់ទេ។

ចំពោះ ជនដៃដល់ក្នុងរឿងនេះ សមត្ថកិច្ចកំពុងធ្វើការស្រាវជ្រាវ ដើម្បីចាត់ការបន្តតាមច្បាប់។

បច្ចុប្បន្ន៖ សាកសព ត្រូវបានដឹកតាមរថយន្តយកទៅប្រគល់ជូនកម្លាំងជំនាញការិយាល័យពិនិត្យពិភាគកន្លែងកើតហេតុនាយកដ្ឋានបច្ចេកទេសវិទ្យាសាស្រ្ត  រក្សាទុកនៅសាលរក្សាសពវត្តស្ទឹងមានជ័យរាជធានីភ្នំពេញ៕