ខេត្តស្ទឹងត្រែង៖ កម្លាំងកងរាជអាវុធហត្ថខេត្តស្ទឹងត្រែង បានឃាត់ខ្លួនជនសង្ស័យម្នាក់ ព្រមទាំងដកហូតបានគ្រឿនញៀនជិត១គីឡូក្រាម កាលពីវេលាម៉ោង១២ និង១៥នាទីថ្ងៃត្រង់ទី៥ ខែសីហា ឆ្នាំ២០១៦ ត្រង់ចំណុចភូមិស្រែឫស្សី ឃុំស្រែឫស្សី ស្រុកថាឡាបរិវ៉ាត់ ខេត្តស្ទឹងត្រែង។

បើតាមមេបញ្ជាការកងរាជអាវុត្ថខេត្ត លោកឧត្តមសេនីយ៍ត្រី អៀង វ៉ាន់ឌី បានឲ្យដឹងថា ជនសង្ស័យគឺជាមុខសញ្ញាចាស់ដែលសមត្ថកិច្ចតាមប្រម៉ាញ់យូរមកហើយ មុននឹងឈានដល់ការឃាត់ជនសង្ស័យខាងលើនេះ អាវុធហត្ថបានដាក់កម្លាំងតាមឃ្លាំមើលយ៉ាងយកចិត្ត ទុកដាក់ព្រមទាំងស៊ើបអង្កេតអស់ជាច្រើនថ្ងៃ និងដោយប្រើវិធានញួសញុង ទើបអាចកំណត់មុខសញ្ញាបានរួចធ្វើការឃាត់ខ្លួន ខណៈជនសង្ស័យកំពុងធ្វើសកម្មភាព ។

លោកបញ្ជាក់ថា ជនសង្ស័យមានឈ្មោះ វ៉ាន់ឌី អូន ភេទប្រុស អាយុ៤៨ឆ្នាំ ជនជាតិខ្មែរ មុខរបរធ្វើស្រែ និងអាឈើ រស់នៅភូមិហាស៊ីឃូន ឃុំហាស៊ីឃូន ស្រុកមឿងខូង ខេត្តចំប៉ាសាក់ នៃប្រទេសឡាវ។

ក្រោយការឃាត់ខ្លួន ជនសង្ស័យខាងលើ សមត្ថកិច្ចរឹបអូសបានវត្ថុតាងរួមមាន រថយន្តម៉ាកហាយឡាក់ វី ហ្គោ ពណ៌ស្ករ ស្លាកលេខឡាវ ១គ្រឿង និងគ្រឿងញៀនមួយកញ្ចប់ធំដែលមានទម្ងន់ ស្មើនឹង១គីឡូក្រាម ។

បច្ចុប្បន្នជនសង្ស័យរួមនឹងវត្ថុតាងត្រូវបានកម្លាំងនាំមកបញ្ជាការដ្ឋានកងរាជអាវុហត្ថខេត្ត ដើម្បីកសាងសំណុំរឿងបញ្ជូនបន្តទៅកាន់តុលាការ ៕

ដោយ៖ វុទ្ធឦសាន្ត