ភ្នំពេញ ៖ ក្នុងរយៈពេល១ឆ្នាំមកនេះ គិតចាប់ពីខែកញ្ញា ឆ្នាំ២០២៣ ដល់ខែសីហា ឆ្នាំ២០២៤ មន្រ្តីរាជការសុីវិល និងមន្រ្តីនគរបាលជាតិ ដែលមានសមត្ថកិច្ចក្នុងការងារអត្តសញ្ញាណកម្ម នៅទូទាំងប្រទេស បានផ្ដល់សៀវភៅស្នាក់នៅជូនប្រជាពលរដ្ឋបានជាង១០ម៉ឺនក្បាល និងបានបំបែកសៀវភៅគ្រួសារថ្មីជូនប្រជាពលរដ្ឋបានជាង៤មុឺននក្បាល។ នេះបើតាមលោក ទូច សុឃៈ (សុខៈ) អ្នកនាំពាក្យរងក្រសួងមហាផ្ទៃ។
លោក ទូច សុឃៈ (សុខៈ) បានលម្អិតឱ្យដឹងថា បើតាមរបាយការណ៍របស់នាយកដ្ឋានអត្តសញ្ញាណកម្ម ក្នុងចំណោមសេវាដែលផ្ដល់ជូនខាងលើ មន្រ្តីបានផ្តល់សៀវភៅស្នាក់នៅថ្មីចំនួន ១៣២,៥១២ក្បាល (ក្នុងនោះមានអ្នកស្នើបំបែកសៀវភៅស្នាក់នៅថ្មីចំនួន ៤៣,៧៤៤ក្បាល) បានទុតិយតា (ធ្វើឡើងវិញ) សៀវភៅស្នាក់នៅចំនួន ១១៦,៦៩៨ក្បាល បានផ្តល់សៀវភៅគ្រួសារថ្មីចំនួន ១០០,០៤៩ក្បាល (ក្នុងនោះមានអ្នកស្នើបំបែកសៀវភៅគ្រួសារថ្មី ចំនួន ៣៣,៧៨៦ក្បាល) និងបានធ្វើទុតិយតាសៀវភៅស្នាក់នៅចំនួន ៨៧,៧៨៥ក្បាល។
ដោយឡែក ចំពោះការបញ្ចូលទិន្ន័យចុះបញ្ជីទៅក្នុងប្រព័ន្ធកុំព្យូទ័រវិញ លោកបណ្ឌិត ទូច សុឃ: បានបញ្ជាក់ទៀតថា សម្រាប់ការអនុវត្តនៅខេត្តកែប កំពត និង១៤សង្កាត់នៃរាជធានីភ្នំពេញ ទទួលបានលទ្ធផល រួមមាន បានបញ្ចូលសៀវភៅស្នាក់នៅចំនួន ៣,៧៦៧គ្រួសារ ស្មើនឹងមនុស្ស ១៥,៧៩៦នាក់ ស្រី៨,០៣០នាក់ និងសៀវភៅគ្រួសារចំនួន ១,១១៥គ្រួសារ ស្មើនឹងមនុស្ស ៤,៤៧០នាក់ ស្រី២,៣០២នាក់។ នេះបើគិតក្នុងរយៈពេលមួយឆ្នាំដូចគ្នា៕
ដោយ ៖ សិលា
