ខេត្តក្រចេះ ៖ ខេត្តក្រចេះនៅឆ្នាំនេះ មានបេក្ខជន
ប្រឡងសញ្ញាបត្រមធ្យមសិក្សាទុតិយភូមិសរុប ២៤០៥នាក់ ស្រី១៣៤៣នាក់ ក្នុងនោះបេក្ខជនស្វៃរិន ៣៥៨នាក់ ស្រី ១៦៨នាក់ ត្រូវចូលរួមប្រឡង នៅថ្ងៃទី៨ និងទី៩ ខែតុលា ឆ្នាំ ២០២៤នេះ។
លោក ឡាយ បូរ៉ា ប្រធានមន្ទីរអប់រំ យុវជន និងកីឡាខេត្តក្រចេះ បានឲ្យដឹងថា មណ្ឌលប្រឡង ចំនួន ៥មណ្ឌល ក្នុងនោះ មណ្ឌលវិទ្យាសាស្ត្រមាន ២ និងមណ្ឌលវិទ្យាសាស្ត្រសង្គម មានចំនួន ៣ ស្មើនឹង ៩៧បន្ទប់ រីឯគណៈមេប្រយោគ សរុបមានចំនួន ៣២៤នាក់ ស្រី ១២៥នាក់។
លោកប្រធានមន្ទីរអប់រំ យុវជន និងកីឡាខេត្ត បានបន្តឲ្យដឹងថា បេក្ខជនដែលចូលរួមប្រឡងសញ្ញាបត្រមធ្យមសិក្សាទុត្តិយភូមិ ឆ្នាំ ២០២៤នេះ បើធៀបទៅនឹងឆ្នាំ ២០២៣ មានបេក្ខជនសរុប ២៣៤៤នាក់ មានការកើនឡើង ៦១នាក់ ។
ជាក់ស្ដែងនៅថ្ងៃទី៧ ខែតុលា ឆ្នាំ២០២៤នេះ បេក្ខជនប្រឡងសញ្ញាបត្រមធ្យមសិក្សាទុតិយភូមិ ក្នុងខេត្តក្រចេះបាននាំគ្នាមកពិនិត្យបញ្ជីឈ្មោះ លេខតុ លេខបន្ទប់ នៅតាមមណ្ឌលប្រឡងនីមួយៗ ដើម្បីត្រៀមលក្ខណៈក្នុងការប្រឡងនៅថ្ងៃស្អែក ។
ក្នុងសកម្មភាពពិនិត្យបញ្ជីឈ្មោះនោះដែរ បេក្ខជន បានអះអាងថា ពួកគេបានត្រៀមលក្ខណៈរួចជាស្រេច ដើម្បីបំពេញវិញ្ញាសារប្រឡងនៅថ្ងៃស្អែក និងជូនពរឲ្យបេក្ខជនដទៃទៀត ទទួលបានជោគជ័យ៕
ដោយ៖ ជីវ័ន្ត
