ភ្នំពេញៈ បុរសម្នាក់ស្រវឹងស្រាជិះម៉ូតូហុងដាឃ្លីកជ្រុលទៅបុកម៉ូតូដឹកផ្លែឈើពីក្រោយ បណ្ដាលឱ្យដួលសន្លប់ស្តូកខ្លួនឯង ។
ហេតុការណ៍នេះបានកើតឡើងនៅវេលាម៉ោង១០និង៥០នាទីយប់ថ្ងៃទី២២ខែតុលាឆ្នាំ២០២៤ ត្រង់ចំណុចផ្លូវម៉ៅសេទុង កែងផ្លូវលេខ១៨៣ ក្នុងសង្កាត់ទំនប់ទឹក ខណ្ឌបឹងកេងកង។
តាមប្រភពព័ត៌មានពីកន្លែងកើតហេតុ បានអោយដឹងថា មុនកេីតហេតុគេបានឃើញបុរសម្នាក់បានជិះម៉ូតូម៉ាកហុងដាឃ្លីក ពណ៌ក្រហមលាយស ពាក់ស្លាកលេខភ្នំពេញ 1FK-9129 ធ្វើដំណើរតាមបណ្ដោយផ្លូវម៉ៅសេទុងក្នុងទិសដៅពីជេីងទៅត្បូងដោយល្បឿនលឿននិងក្នុងស្ថានភាពស្រវឹង។ លុះមកដល់ចំនុចកេីតហេតុ ក៏ស្រាប់តែជ្រុលទៅបុកម៉ូតូដឹកផ្លែឈើដែលជិះដោយប្តីប្រពន្ធ២នាក់ពីក្រោយ ដែលធ្វើឲ្យម៉ូតូហុងដាឃ្លីកដួលអូសជាច្រើនម៉ែត្ររលាត់ដៃជើងអ្នកជិះនិងសន្លប់ស្តូកស្តឹងមួយសន្ទុះក៏ដឹងខ្លួនវិញ តែក្នុងស្ថានភាពស្រវឹងវង្វេងវង្វាន់ស្មារតី ត្រូវបានសមត្ថកិច្ចហៅរថយន្តសាមុយមកដឹកយកទៅព្យាបាលរបួសនៅមន្ទីរពេទ្យរុស្ស៊ី។
ដោយឡែកខាងម៉ូតូដឹកផ្លែឈើមិនបានដួលទេគ្រាន់តែធ្លាក់ផ្លែឈើខូចខាតតិចតួច ក៏បន្តដំណើរទៅមុខទៀតបាត់ទៅ។
ក្រោយពេលកេីតហេតុ នៅសល់តែម៉ូតូត្រូវសមត្ថកិច្ចជំនាញចរាចរណ៍យកទៅរក្សាទុកនៅអធិការដ្ឋាននគរបាលខណ្ឌបឹងកេងកង ៕
ដោយ៖ សុខាសែនជ័យ
