ខេត្តបាត់ដំបង៖ លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង បានឱ្យដឹងនៅព្រឹកថ្ងៃព្រហស្បតិ៍ទី៣១ ខែតុលា ឆ្នាំ២០២៤នេះថា៖ មុខសញ្ញាចោរលួចកាត់ខ្សែភ្លើងអ្នកភូមិទាំងកណ្ដាលថ្ងៃម្នាក់ ត្រូវបាននគរបាលស្រុកសង្កែ ចុះស្រាវជ្រាវរហូតឈានដល់ការបង្រ្កាប និងឃាត់ខ្លួនយកមកសាកសួរ ដេីម្បីចាត់ការតាមច្បាប់។
ប្រភពដដែលបន្តថា ក្នុងប្រតិបត្តិការនោះ ដឹកនាំដោយលោកវរសេនីយ៍ទោ យុត តុងហូ អធិការនគរបាលស្រុកសង្កែ កាលពីយប់ថ្ងៃទី២៩ ខែតុលា ឆ្នាំ២០២៤ថ្មីៗនេះ បានធ្វេីការបង្រ្កាបនិងឃាត់ខ្លួនជនសង័្សយម្នាក់ ក្នុងចំណោមបក្សពួកផ្សេងទៀតនោះគឺឈ្មោះ នី វិច្ឆិកា ហៅឈីត ភេទប្រុស អាយុ៣០ឆ្នាំ មានទីលំនៅភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ក្នុងខណៈដែលរូបគេកំពុងព្យាយាមរត់គេចខ្លួនពីសមត្ថកិច្ចដែលតាមប្រម៉ាញ់ ដោយនាំមកកាន់អធិការដ្ឋានដើម្បីធ្វើការសាកសួរ ។
សូមជម្រាបជូនថា នៅមុនពេលឃាត់ខ្លួននេះគឺក្រុមជនសង័្សយបានធ្វើសកម្មភាពលួចកាត់ខ្សែភ្លើងទាំងថ្ងៃ របស់ជនរងគ្រោះឈ្មោះទេន ស៊ាន ភេទស្រី អាយុ៤១ឆ្នាំ រស់នៅក្រុមទី ៣៨ភូមិបោះពោធិ៍ ឃុំអូរដំបង១ ស្រុក សង្កែ ខេត្តបាត់ដំបង អស់ប្រវែង៥០ម៉ែត្រ ។ ហើយពេលកំពុងធ្វើសកម្មភាពនេះ ត្រូវបានប្រជាពលរដ្ឋប្រទះ ឃើញ និងបានផ្តល់ព័ត៌មានមកសមត្ថកិច្ចនគរបាល ហើយសមត្ថកិច្ចបានចុះអន្តរាគមន៍ធ្វើការស្រាវជ្រាវភ្លាមៗ រហូតកំណត់មុខសញ្ញាបាននិងធ្វើការឃាត់ខ្លួនតែម្តង។
ជនសង័្សយរូបនេះបានឆ្លើយសារភាពថា រូបគេនិងបក្សពួកផ្សេងទៀត(សមត្ថកិច្ចកំណត់មុខសញ្ញាបាន)បាន ធ្វើសកម្មភាពលួចកាត់ខ្សែភ្លើងប្រជាពលរដ្ឋនៅមូលដ្ឋានខាងលើប្រាកដមែន ប៉ុន្តែខ្សែភ្លើងដែលលួចបានត្រូវ បក្សពួកជាអ្នកយកទៅហើយដែលសមត្ថកិច្ចកំពុងស្រាវជ្រាវឃាត់ខ្លួនជាបន្តទៀត៕
ដោយ៖តារា
