ភ្នំពេញ ៖ បុរសម្នាក់សង្ស័យស្រវឹងស្រាបានបើករថយន្តក្នុងល្បឿនលឿនដល់ផ្លូវកោងបត់មិនទាន់ក៏បុករះចូលកន្លែងលក់គ្រឿងសមុទ្របណ្ដាលឲ្យខូចខាតទាំងរថយន្តផងដែរ ។
ហេតុការណ៍នេះបានកេីតឡេីងនៅវេលាម៉ោង១២រំលងអធ្រាត្រឈានចូលថ្ងៃទី០២ ខែវិច្ឆិកា ឆ្នាំ២០២៤ ស្ថិតនៅតាមបណ្ដោយផ្លូវលេខ២៧១ សង្កាត់អូរបែកក្អម ខណ្ឌសែនសុខ រាជធានីភ្នំពេញ។
បើតាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តមួយគ្រឿងម៉ាក LAND CRUISER ពណ៌ក្រហម ពាក់ផ្លាកលេខ ភ្នំពេញ 2E-6941 បើកបរដោយបុរសម្នាក់វ័យប្រហែល៥០ឆ្នាំជាង តែម្នាក់ឯងក្នុងទិសដៅពីជើងទៅត្បូងក្នុងល្បឿនលឿន លុះមកដល់ចំណុចកើតហេតុផ្លូវកោងបួងចង្កូតមិនទាន់បានជ្រុលទៅបុករថយន្ដ Fortuner ពណ៌ស ពាក់ផ្លាកលេខ ភ្នំពេញ 2BB-9956 ដែលចតចោលមុខផ្ទះ រួចរថយន្តមិនទាន់អស់ល្បឿនក៏ជ្រុលទៅបុកចូលហាងលក់គ្រឿងសមុទ្របន្ថែមបណ្ដាលឱ្យរងការខូចខាត។
បើតាមការបញ្ជាក់ពីម្ចាស់ហាងបានឱ្យដឹងថា បុរសខាងលើដែលបើករថយន្តបុករះខាងលើនេះ ពេលបង្កគ្រោះចរាចរណ៍រួចត្រូវបានបុគ្គលិកនឹងអ្នកធើ្វដំណើរជួយឃាត់ប្រគល់ជូនសមត្ថកិច្ច ដោយពេលចុះពីលើរថយន្តមានក្លិនស្រា ។
ក្រោយពេលកេីតហេតុសមត្ថកិច្ចជំនាញចរាចរណ៍ផ្លូវគោកនៃអធិការដ្ឋាននគរបាលខណ្ឌសែនសុខចុះមកធ្វើការវាស់វែងយករថយន្តទៅរក្សាទុករង់ចាំការដោះស្រាយនៅពេលក្រោយ ៕
ដោយ៖សុខាសែនជ័យ
