​    ភ្នំពេញ៖ បុរសម្នាក់បានសន្លប់ស្ដូកស្ដឹងនិងហូរឈាមពេញកណ្ដាលផ្លូវ បន្ទាប់ពីត្រូវរថយន្ដមិនស្គាល់ម៉ាកបេីកបុកពេញទំហឹងធ្លាក់ពីលើម៉ូតូបោកក្បាលនិងថ្នល់ ចំណែករថយន្ដបង្កបើករត់គេចបាត់ស្រមោល កាលពីវេលាម៉ោង១២ និង១០ នាទីថ្ងៃត្រង់ នៅថ្ងៃទី០៤ ខែវិច្ឆិកា ឆ្នាំ២០២៤ ស្ថិតតាមបណ្ដោយផ្លូវម៉ុងរិទ្ធី ក្នុងសង្កាត់ភ្នំពេញថ្មី ខណ្ឌសែនសុខ ។

    តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញជនរងគ្រោះខាងលើជិះម៉ូតូម៉ាកសងការ៉េ ពណ៌ក្រហម ពាក់ផ្លាកលេខតាកែវ 1E.4985 ធ្វើតាមបណ្ដោយផ្លូវ ម៉ុង រឹទ្ធី ទិសដៅពីលិចមកកើត លុះធ្វើដំណើរដល់ចំមុខផ្សារទំនើបជីបម៉ុង ស្រាប់តែមានរថយន្ដមួយគ្រឿងមិនស្គាល់ម៉ាក ដោយមិនដឹងថាបើកចេញពីទិសណានោះទេបានបុកជនរងគ្រោះខាងលើដែលកំពុងជិះម៉ូតូបណ្ដាលឲ្យធ្លាក់ពីលើម៉ូតូដួលសន្លប់ស្ដូកស្ដឹង ដោយជើងខាងស្ដាំបានដាច់ហូរឈាមពេញផ្លូវរងរបួសធ្ងន់ ។ ភ្លាមនោះប្រជាពលរដ្ឋដែលធ្វេីដំណេីរឆ្លងកាត់បានជួយលើកយកមកចិញ្ចើមផ្លូវរួមទាំងម៉ូតូ និងត្រូវបានឡំប្រឺតាដឹកទៅមន្ទីរពេទ្យលោកសង្ឃសង្គ្រោះអាយុជីវិតផងដែរ ។ ចំណែករថយន្ដបង្កបានបើករត់គេចបាត់ស្រមោលទាំងកណ្ដាលថ្ងៃ ដោយម៉ូតូជនរងគ្រោះរងការខូចខាតផ្នែកពីមុខយ៉ាងដំណំ ។ 

    ក្រោយមក សមត្ថកិច្ចមូលដ្ឋានបានចុះមកដល់ចំនុចកើតហេតុ និងបានទាក់ទងទៅសមត្ថកិច្ចជំនាញចរាចរណ៍ធ្វើការវាលវែងយកម៉ូតូជនរងគ្រោះទៅរក្សាទុកនៅប៉ុស្ដិ៍នគរបាលភ្នំពេញថ្មី បណ្ដោះអាសន្ន ។ ចំណែករថយន្តបង្កវិញ សមត្ថកិច្ចជំនាញនិងធ្វេីការស្រាវជ្រាវឆែកមើលកាមេរ៉ាសុវត្ថិភាពនៅទីតាំងនៅកន្លែងកើតហេតុដើម្បីសម្គាល់រករថយន្តបង្កនិងម្ចាស់មកដោះស្រាយតាមច្បាប់ ៕ដោយ ៖ ភារ៉ា ដង្កោ