ខេត្តមណ្ឌលគីរី៖ ស្នងការដ្ឋាននគរបាលខេត្តមណ្ឌលគិរី បានឱ្យដឹងថា បុរសម្នាក់ ត្រូវបានខ្សែរភ្លើងដែលខ្លួនបានរាយដាក់អន្ទាក់សត្វ បណ្តាលឱ្យឆក់ខ្លួនឯងស្លាប់បាត់បង់ជីវិតនៅកន្លែងកើតហេតុ កាលពីល្ងាចថ្ងៃទី៥ ខែវិច្ឆិកា ឆ្នាំ២០២៤ម្សិលមិញនេះ នៅចំណុចភ្នំក្រាទូក ស្ថិតនៅក្នុងភូមិ ពូទឺត ឃុំប៊ូស្រាស្រុកពេជ្រាដាខេត្តមណ្ឌលគិរី ។
ប្រភពដដែលបន្តថា បុរសម្នាក់ដែលជាជនរងគ្រោះមានឈ្មោះ ណ្អើប តូន ភេទប្រុស អាយុ ៣៩ឆ្នាំ ជនជាតិ ភ្នង សញ្ជាតិខ្មែរ មុខរបរកសិករ មានទីលំនៅបច្ចុប្បន្ន ភូមិពូទឺត ឃុំប៊ូស្រា ស្រុកពេជ្រាដា ខេត្តមណ្ឌលគិរី ត្រូវបានខ្សែរភ្លើងដែលខ្លួនបានរាយឆក់សត្វក៏បានឆក់ខ្លួនឯងស្លាប់បាត់បង់ជីវិត នៅនឹងកន្លែងកើតហេតុ។
យោងតាមការឆ្លេីយបំភ្លឺរបស់ឈ្មោះ កេត ធ្វិញ ភេទស្រី អាយុ ៤០ឆ្នាំ ត្រូវជាប្រពន្ធ បានធ្វេីការបំភ្លឺប្រាប់សមត្ថកិច្ចយើងថា៖ កាលពីថ្ងៃទី០៥ ខែវិច្ឆិកា ឆ្នាំ២០២៤ វេលាម៉ោង ១៧ និង ០០នាទី ប្តីរបស់ខ្លួន បានទៅដាក់អន្ទាក់ស្វានៅចំណុចចំការស្រូវ ភ្នំក្រាទូក ដោយមានសម្ភារៈមួយចំនួនដូចខាងក្រោម៖
១- អាគុយ ១២០ អំពែ ចំនួន(០១)។
២- ខ្សែលួស ចំនួន ០៣ដុំ ។
៣- ដុំឆក់ ចំនួន (០១)។
ប្រភពដដែលបន្តថា លុះរហូតដល់ម៉ោង ៧ជាងយប់ថ្ងៃដដែលគាត់ដែលជាប្រពន្ធមិនឃេីញប្តីវិលត្រឡប់ មកផ្ទះវិញស្មានតែប្តីដេីរផឹកតាមផ្ទះគេ ព្រោះគាត់ធ្លាប់តែអញ្ជឹង។ លុះដល់ព្រឹកឡេីងថ្ងៃទី០៦ ខែ វិច្ឆិកា ឆ្នាំ ២០២៤ នៅវេលា ម៉ោង ០៥ ទៀបភ្លឺនៅតែមិនឃេីញប្តី ត្រឡប់មកផ្ទះវិញ នាងខ្ញុំក៏មានការសង្ស័យថាក្រែងគាត់ ឆក់ខ្សែរអន្ទាក់ដែលគាត់បានដាក់ក៏ទៅតាមរកជាមួយកូន។ ដេីរតាមខ្សែរលួសដែលដាក់ជាប់ចំការ ស្រូវ ដេីរដល់ក្បាលចំការក៏បានប្រទះឃេីញប្តីរបស់នាងខ្ញុំដេកស្លាប់ផ្កាប់មុខ ដោយជេីងខាងឆ្វេងជាន់លេីខ្សែរ ភ្លើងដែលគាត់បានរាយនោះនៅក្រោមដេីមប្ញស្សីខ្លៃ។
ក្រោយកេីតហេតុកម្លាំងសមត្ថកិច្ចបានធ្វើការត្រួតពិនិត្យលើដងខ្លួនសាកសពផ្នែកក្បាល ផ្នែកដងខ្លួន និង ផ្នែកអវៈយវៈ ពុំមានស្លាកស្នាម ដាច់ រឺ រលាត់នៅលើ សាកសពក្រៅពីស្លាកស្នាមចំណុចកែងជេីងឡើយមានស្នាមជាំខ្មៅដោយខ្សែរលួសឆក់ទើបសន្និដ្ឋានបានថាសពខាងលើពិតជាបានឆក់ខ្សែរលួសដាក់ អន្ទាក់ខ្លួនឯងស្លាប់ ពិតប្រាកដមែន។
បច្ចុប្បន្នសពត្រូវបានកម្លាំងជំនាញ នៃអធិការដ្ឋាននគរបាលស្រុកពេជ្រាដាបានប្រគល់ជូនក្រុមគ្រួសារសាច់ញាតិនៃសព យកទៅធ្វើបុណ្យតាមប្រពៃណី ៕ដោយ៖តារា
