ភ្នំពេញ៖ មេកន្ទុយលេខដ៏ធំនៅខណ្ឌមានជ័យត្រូវបានឃាត់ខ្លួនកាលពីវេលាម៉ោង១រសៀលថ្ងៃទី១ ខែសីហា ឆ្នាំ២០១៥ ក្នុងប្រតិបត្តិការរបស់អាជ្ញាធរខណ្ឌមានជ័យចុះបង្ក្រាបកន្លែងលួចកត់កន្ទុយលេខ ស្ថិតនៅចំណុចភូមិទួលរកាមួយ សង្កាត់ចាក់អង្រែក្រោម ខណ្ឌមានជ័យ ។
ការចុះបង្ក្រាបទីតាំងកត់កន្ទុយលេខខាងលើនេះ ដឹកនាំដោយ លោក ខាំ សុផារី ព្រះរាជអាជ្ញារង អមសាលាដំបូងរាជធានីភ្នំពេញ និងលោក ឌី រ័ត្នខេមរុន អភិបាលរងនៃគណៈអភិបាលខណ្ឌមានជ័យ ។
ជនសង្ស័យ២នាក់ ត្រូវបានឃាត់ខ្លួនបញ្ជូនទៅកាន់ទីបញ្ជាការកងរាជអាវុធហត្ថខណ្ឌជាមួយវត្ថុតាង មានម៉ាស៊ីនហ្វាក់៦គ្រឿង ទូរស័ព្ទដៃ២គ្រឿង ម៉ាស៊ីនគិតលេខ២គ្រឿង និងថវិកា ព្រមទាំងឯកសារកន្ទុយលេខជាច្រើនទៀត ។
គួររំលឹកថា ជនសង្ស័យដែលឃាត់ខ្លួន២នាក់ ហើយត្រូវសមត្ថកិច្ចអះអាងថា ជាមេខ្លោងម្ចាស់ទីតាំងគឺនឹងត្រូវបញ្ជូនទៅកាន់សាលាដំបូង ដើម្បីអនុវត្តតាមនីតិវិធី ហើយគេមានជំនឿថា តំណាងអយ្យការនឹងចោទប្រកាន់ ពីព្រោះអ្នកមានចេតនាទុច្ចរិតលួចបើកទីតាំងកត់កន្ទុយលេខ ក៏ដូចជាល្បែងស៊ីសង ពិតជាបានធ្វើឲ្យប៉ះពាល់ដល់សង្គម និងល្មើសច្បាប់ សុទ្ធតែបង្កើតឲ្យមានបទល្មើស ។ ដូច្នេះ គេមានជំនឿថា តំណាងអយ្យការ លោក ខាំ សុផារី នឹងចាត់វិធានការ ក្នុងករណីនេះ ប្រកបដោយតម្លាភាព បើទោះជាកន្លងទៅ គាត់ត្រូវបានគេរិះគន់ថា ធ្លាប់ដោះលែង ជនល្មើសបង្កគ្រោះថ្នាក់ជាញឹកញាប់នោះ ៕ តាឡឹម
